KUZOHLUKANA INHLOKO NESIXHANTI KWEYE-NFD
IZOLALA ibonene emakilabhini agijima kwinational First Division (NFD) njengoba kuzoshona elanamuhla ngesonto sekucacile ukuthi yimaphi azogencwa yizembe namabili azodlala eyokuhlungela ukunyukela kwi-absa Premiership nezoqeda ibambe isibili ukusuka emsileni esigabeni esikhulu.
Iligi YENFD iyagoqwa namuhla ngesonto kanti ithanda Royal Zulu ewaqwaqwade wonke emakhanda izothweswa umqhele emuva komdlalo ezowugijima nereal Kings United namuhla ngesonto ngo-15h00 esugar Ray Xulu Stadium, eclermont.
Lo mdlalo kawusabalulekile kula makilabhu njengoba ithanda isiyizingqwele kanti ikings ilibalekele kusanesikhathi izembe yize ibinganikwa lutho njengoba ingomakoti. Nokho umbango ushube phansi emakilabhini alwela ukuya kweyokuhlunga.
Iblack Leopards ibukeka isiyibekisile eyayo indawo kule midlalo okusho ukuthi sekusele eyodwa. Ngokwezibalo amakila- bhu asembangweni ngamazulu FC, yistellenbosch, yiroyal Eagles newitbank Spurs. Usuthu yilona olubukeka lusethubeni ukuwedlula wonke la makilabhu.
Ukuze lungene kule midlalo kufanele luguqise IFC Cape Town namuhla ngesonto ngo-15h00 ENNK Stadium, ecape Town. Ludinga iwini nje kuphela hhayi okunye njengoba luzishiya ngephuzu izimbangi. Nokho kulindeleke ukuba lo mdlalo ushube kwazise ukuhlulwa kwefc Cape Town kuzoyishovela kwi-abc Motsepe League.
Kufanele iwunqobe lo mdlalo uma ifuna ukusinda bese imincela ukuthi imagesi ihlulwe yimbombela United namuhla ngo-15h00 Kanyamazane Stadium, empumalanga. I-eagles nayo ethwele amathemba akwazulu-natal ibhekene nomdlalo onzima njengoba izodudulana nespurs namuhla ngo-15h00 epuma Rugby Stadium, ewitbank.
Lo mdlalo umqoka kuwona womabili la makibhu njengoba esanethuba lokungena kweyokuhlunga. Nokho ezonqoba kufanele imincele ukuthi kuhlulwe Amazulu FC nestellenbosch ezobhekana nesantos namuhla ngo-15h00 e-athlone Stadium.
Istellenbosch kubukeka ingeke ihlulwe kulo mdlalo kwazise isantos isigcina icala njengoba kudala layigenca izembe.
Nokho izingqapheli zebhola zithipha usuthu ukuthatha lesi sikhala esisele bese IFC Cape Town ilibhekisa kwimotsepe League.
* Imidlalo yokusonga INFD namuhla ngesonto iqhathwe kanje:
Ethohoyandou: Black Leopards vs Mthatha Bucks 15h00.
Etsakane: Jomo Cosmos vs University of Pretoria 15h00.
Epuma Rugby: Witbank Spurs vs Royal Eagles 15h00.
E-NNK Rugby: FC Cape Town vs Amazulu 15h00.
E-athlone: Stellenbosch FC vs Santos 15h00.
Eparow Park: Cape Town All Stars vs Milano United 15h00.
Kanyamazane: Mbombela United vs Magesi FC 15h00.
Esugar Ray Xulu: Real Kings vs Thanda Royal Zulu 15h00.
senzos@ilanganews.co.za