Mayisukunyelwe eyodlame kwi-psl
KUBUKEKA zisazokuba yinsada izidumbu emidlalweni ye-absa Premiership njengoba zilokhu zanda izigameko zodlame ezinkundleni.
Lo mkhuba wobudlova ubukeka ungeke uphele ngoba ipremier Soccer League (PSL) kungathi izithele ngabandayo ukuthathela izinyathelo ezinqala amakilabhu athintekayo.
Idispute Resolution Chamber YEPSL ibukeka ifana nenja engenamazinyo ngoba iphuthuma ukuhlalela amacala angathi shu nangaphuthumi kangako bese ithatha izinqumo ngokushesha.
Kunezigameko ezisanda kwenzeka zahlalelwa kwaze kwakhishwa nezinqumo, kodwa kusacwebe iziziba ngesokugasela kwabalandeli be-orlando Pirates enkundleni mhla ibhudluzwa yimamelodi Sundowns ngo-6-0 eloftus Stadium, etshwane. Kulokhu kuthalaliswa nje ngalolu daba, kodwa kasikhohliwe wukuthi Amazulu ajeziswa ngokuthi adlale ngaphandle kwabalandeli ngesigameko esingatheni.
Ngesikhathi ipirates idudulana nedowns ngeledlule, kulimale kabi ujohannes Maseko waseAtteridgeville ongumlandeli wokuqina wamabrazilian okuze kwaphoqa ukuthi aphuthunyiswe esibhedlela, ibaragwanath, esoweto. Kulo mdlalo obuse-orlando Stadium, esoweto, kuklejulwe namafulegi abalandeli bedowns enqobe ngo-2-0. Lezi zigameko ngabe kazenzeki ukuba IPSL iqinisa isandla ngokufana kubona bonke abenzi bobubi.
Kuhlasimulisa umzimba-ke okwenzeke kubhekene imaritzburg United neplatinum Stars ngolwesithathu ebusuku emgungundlovu. Lapha kusuke uthu- thuva oluholele ekumisweni komdlalo isikhashana kukubi. Kuze kwangenelela amaphoyisa. Lezi zigameko ziyibeka kabi IPSL futhi ziphoxa abaxhasi bayo.
Amakilabhu nawo kumele asolwe ngokungaqhamuki nezinhlelo ezibambekayo zokufundisa abalandeli ngokuziphatha ezinkundleni.
Amakilabhu awabakhuthazi nabathandi bebhola ukuthatha ubulungu bekilabhu ukuze kube lula ukuhlonza labo abangamahlongandlebe. Nokho-ke kuyacaca ukuthi lokhu kwenziwa wukuthi amakilabhu kawasayincengile kangako imali yabalandeli ngoba asethola izishaqane zemali zinyanga zonke kwipsl.
Nxa kunezigameko zodlame enkundleni ikilabhu esuse uthuthuva izithethelela ngokuthi akubona abalandeli bayo ngoba kabekho emazikweni, kodwa ngabantu abangene ezitolo ezithengisa izimpahla zayo. Umnyango WamaPhoyisa kumele ubekele IPSL imibandela eqinile ukuze ikhuthalele ukuphepha kwabantu ezinkundleni.
Noma kungagxekwa lokhu kuthiwe uhulumeni kakumele agxambukele ebholeni, kodwa akumele kusongwe izandla abantu bengaphephile.
Okunye okubukeka kukhuthaza abalandeli ukususa uthuthuva ezinkundleni wukuthi onogada kabavumelekile ukuphatha izibhamu. Lokhu kwenza kube lula ngisho ukuthi abalandeli bafuhleleke enkundleni.
Lokhu-ke kukhomba ukuthi kumele kube ngamaphoyisa aqinisekisa ezokuphepha enkundleni. Mhlawumbe IPSL iyakhohlwa wukuthi abaxhasi bayo bangene ngenxa yokuyenga abalandeli ukweseka imikhiqizo yabo. Nxa sebesaba ukuya ezinkundleni nabaxhasi bayophuma belandelana bese amakilabhu ebuyela endlaleni.
Yize sikugxeka ubukhotheni ezinkundleni, kasikwazi ukuziba izinsolo ezenziwe ngujohn Comitis ongumnikazi wecape Town City ezibhekise kupitso Mosimane ongumqeqeshi wemamelodi Sundowns.
Ngivumelana naye impela ucomitis nxa ethi kube liphutha elikhulu ukuthi umosimane athinte u-aubrey Ngoma amthembise itshe le mali.
Lokhu kwenzeke ngaphambi komdlalo wecity nemaritzburg United. Ngaphambi kwalo mdlalo icity ibisesembangweni nedowns wokudla isicoco se-absa Premiership. Lokhu ngeke kungawudungi umqondo womdlali. Isundowns kumele imkhuze umosimane kulo mkhuba ngoba ungcolisa unobhutshuzwayo.