"Kuyangikhulisa ukusebenza nabanye"
UMA ucabanga umculo wekwaito ngeke lingakufikeli igama likaprofessor Langa ongomunye wabaculi abadlisayo kulolu hlobo lomculo.
U-professor ungomunye wabaculi abadumile futhi osekhiqize inqwaba yezingoma ezishisa izikhotha. Kunoma yimuphi umcimbi wobumnandi kukancane lapho ungeke uyizwe khona ingoma enaye futhi othola abantu beyidansela. Abaningi baqale ukumazi ecula notzozo ingoma yodumo ethi “Woz’edurban”.
Uma kuvela ehhovisi ukuthi kumele kupholwe noprofessor ngisukumele phezulu kwazise ungomunye wabaculi engibahloniphayo futhi osezuze olukhulu kulo mkhakha. Ngiphikelele emzini wakhe okwaz emlazi, eningizimu yetheku, ngihamba nomthwebuli waleli phephandaba, USANDILE
MAKHOBA.
Simfica umatasa uxilonga i-laptop yakhe, kukhona azama ukukwenza kodwa sengathi akwenzeki ngendlela okubukeka ngayo.
“Hhola bafwethu, kuhamba kanjani?” esamukela singena ngaphakathi. Kumabonakude kudlala iphalamende nokwenza ngibe nentshisekelo yokwazi ukuthi ucabangani ngesimo sepolitiki eningizimu Afrika.
“Isimo esibhekene naso sepolitiki sibi ngoba iqembu elibusayo libukeka sengathi lihlukene phakathi. Ubonakala uxhawula lo kuthiwe kusho ukuthi uhambisana nolunye uhlangothi. Kungakuhle ukuba kubuyiswane, lihlangane (iqembu) ngoba ukuhlukana kwalo kubuyisela izwe emuva,” kusho uprofessor ekubeka kucace ukuthi uhambisana neqembu elibusayo kodwa akuyona into afuna ukuyiqhakambisa kakhulu leyo. Sisakhuluma ngepolitiki uveza ukuthi uyakhala nangendlela esingenise ngayo emculweni.
“Uma ubheka, singabaculi asihlangene sisodwa nokwenza amabhizinisi ahluleke wukusebenza nathi. Abaculi bajaha izinto ezingahlangani nabo, bazifake kuzona. Uma ubona umculi bheka ukuthi ningasizana kanjani ukuze nikhululisane,”
esho.
U-professor uyaziwa ezingomeni eziningi ebezishisa izikhotha okubalwa kuzo ethi, “Imoto Entshontsh’ imali”, “Jezebel”, “KOTW Anthem” kasphectacula nonaives, “Umsindo wedurban’s Finest nezinye eziningi.
Ugcine ukukhipha i-album egcwele ngowezi-2013 njengoba eveza ukuthi uzimisele ngokukhipha kulo nyaka. Echaza ngesizathu esiholele ekubeni angakhiphi iminyaka emithathu uthi ubesafuna ukuhlanganyela nabanye abaculi.
“Kuhle ukuba noma ungayikhiphanga i-album kodwa ungapheli kubantu. Kuyakukhulisa ukusebenza nabanye abaculi ngoba kuningi okufundayo ngezinhlobo ezahlukene zomculo nangendlela abanye abaculi abenza ngayo izinto,” echaza.
Sikhuluma nje ngiyakuqaphela ukuthi umculo ungaphakathi kuyena njengoba eshintsha nasebusweni uma esekhuluma ngawo.
Uthi ngaphambi kokuba ahlanganyele nomunye umculi noma UDJ kuningi akubhekayo njengokuthi ngeke yini kumehlise isithunzi ukucula nalowo mculi.
“Ngibheka indlela lowo mculi abantu abamamukela ngayo nokuthi ingoma yakhe iyahambisana yini nesitayela sami,” esho. Uthi nakuba kubukeka sengathi izinto zimhambela kahle emculweni kodwa uhlangabezane nazo izingqinamba ezinye zazo ezimfikisela ngosizi.
“Kubuhlungu ukuba abantu bangaliboni igalelo obe nalo empilweni yabo uma sebephumelele. Ngisebenze nabaculi nodj abaningi, ngibhala izingoma ezishise izikhotha kodwa kuyaye kube nzima ukuthola ukunganakwa ngeqhaza engisuke ngilibambile,” esho esukuma eyobheka ekhishini kwazise ubethenge ukudla kwesintu obese kudinga ukufundunyezwa.
Uthi uphatheke kabi ngesikhathi sekuba khona abantu abebefuna ukudla amandla akhe ngengoma ethi, “Woz’edurban”.
“Le ngoma ngayibhala mina futhi ekalawa bayakwazi lokho kodwa sekukhona abantu abahamba betshela abantu okunye,” echaza ngale ngoma ayicula notzozo.
Kuzokhumbuleka ukuthi akubanga kuhle ukuhlukana kwakhe notzozo njengoba kwabikwa izinto eziningi kwaze kwavela nombango wemali phakathi kwabo nokunye. Ngaphambi kokuchaza ngokuhlukana kwakhe notzozo ubuyela kusofa uyazinza.
“Ngesikhathi kwenzeka kwaba buhlungu ngoba utzozo obaziwa kakhulu kunami nakuba besiseqenjini elilodwa ngakho kube nalokho kodwa uma ngibheka manje kwakumele kwenzeke ukuze kube nje. Ngeke ngande kakhulu ngokwasihlukanisa kodwa ngiyabonga ukuthi kwenzeka ngoba kwavela elinye isayidi ngami engangingalinakile,” engeza ngokuthi akananxa notzozo futhi basaxhumana namanje.
Ngolwesine bekunemashi yamaciko lapho ebehambisa uhlu lwezikhalo mayelana nokuthi lungase luphele uhlelo lwakwasaBC lokudlala u-90% womculo ovutshelwe kuleli. U-professor uthi kungakubi kakhulu uma inhlangano yezokusakaza ingase iluqede lolu hlelo.
“Uhulumeni kumele asibhekelele nathi njengamaciko ngoba sibe nayo indima esiyidlalile kulo hulumeni obusayo. Uma bekhankasa bayasithinta siyobakhankasisa, sinandise emicimbini yabo, kwesinye isikhathi ngaphandle kwenkokhelo.
Ngakho makangenelele ngoba thina siyahlomula kulolu hlelo futhi kuyasikhuthaza ukuba siqhubeke nokukhiqiza umculo osezingeni ozothola ithuba lokudlalwa emisakazweni eyahlukene,” kusho lo mculi osanda kusungula inkampani yakhe ebizwa ngeproper Files.
Uthi le nkampani yakhe izosebenza ngokubambisana neKalawa njengoba yona izoqeqesha, ithuthukise amaciko ngaphambi kokuba asayine ngaphansi kwekalawa.
“Ikalawa yikhaya lami okuyilona elingenze ngaba kuleli zinga ngakho angisoze ngayilaxaza. Ukuqala kwami inkampani bekuyindlela yokukhula kulo mkhakha kodwa ngibambisane nekalawa njengoba kuseyiyona enkulu,” esho.
Uth i ne-album yakhe
azoyikhipha ngasekupheleni konyaka izophuma ngaphansi kwazo lezi zinkampani ngokubambisana bese isatshalaliswa yi-universal. Uthe ngaphansi kwenkampani yakhe usayine i-avante, Ndu Shezi, Oros, Malini, Nels, Gudman, DJ Mngani no-emza.
Uprofessor usanda kukhipha ingoma eshisa izikhotha ethi, “Unobenga”. Le ngoma uyicula ngokuhlanganyela nondu Shezi wodumo lweJoyous Celebration nothebe othathwa njengenkakha emculweni wekwaito. “Abantu sebeqalile ukukhombisa ukuyithanda njengoba ngesikhathi iphuma kuma-download ngeledlule ihambe phambili kanti nasezindaweni lapho nginandisa khona abantu bayayidansela. Kuyangijabulisa ngendlela abayamukela ngayo,” esho encoma ingoma yakhe.
Ngaphandle komculo, uprofessor uthi uyazifela ngebhola likanobhutshu zwayo njengoba engumlandeli weKaizer Chiefs, uthi namaqembu akwazulu-natal uyaweseka. “Ngithanda nokubongela ithanda Zulu Royal ngokunyukela esigabeni esiphezulu SEPSL,” esho. Sesiphothula ingxoxo yethu ungazisa ngezinhlelo aphezu kwazo zokwenza umcimbi kamaskandi eport Shepstone ngalapho ezalwa khona. Uthi lo mcimbi uhlela ukuwenza ngasekupheleni kukamandulo (September). “Ngiyazi ukuthi kunoqhekeko olukhona kubaculi kodwa kulo mcimbi sizogqugquzela ubunye nokuzwana,” ephetha.