Kubhekwe imiklomelo ehlabahlosile
KULINDELEKE ukuba unyuke umklomelo kozodla umhlanganiso emncintiswaneni wakuleli wamakhono obizwa ngesa’s Got Talent okhonjiswa esiteshini sikamabonakude esizimele i-e.tv.
Lo mncintiswano, osekuwunyaka wesi-8 uqhubeka kuleli, usunabaxhasi abasha benkampani yezobuchwepheshe isamsung.
Ngokwesitatimende esithunyelelwe abezindaba, ukuhlababana ngalaba baxhasi kwalo mncintiswano kusho ukuthi izokwanda imiklomelo ezotholwa ngabazofinyelela kowamanqamu, nalowo ozodla umhlanganiso.
I-SA’S Got Talent ingenye yemincintiswano ehamba phambili ngokuthakaselwa eningizimu Afrika kanti baningi asebezakhele igama abaqale ukubonakala kuwona lo mncintiswano.
U-marlon Davids, oyimanaging Director kulesi siteshi sikamabonakude, uzwakalise ukujabula ngokujoyinwa yisamsung kulo mncintiswano.
“Kuyintokozo enkulu kithina nakulabo abazongenela lo mncintiswano ukuthola abaxhasi abafana nosamsung. Isamsung yinkampani enkulu futhi ekhiqiza izinto ezihamba phambili kwezobuchwepheshe kanti kuyasithokozisa ukuthi nabo bakukhathalele ukuvundululwa kwethalente eningizimu Afrika,” esho.
Isikhulu sezokumaketha nokuxhumana kwasamsung South Africa, umichelle Potgieter, sincome lo mncintiswano ngokukhiqiza nokuvundulula ithalente eningizimu Afrika.
“Siyazigqaja ngokuba sibe yingxenye yalo mncintiswano kanti sinxusa nabantu baseningizimu Afrika ukuba baphume ngobuningi ukuyoveza amakhono abo ezifundazweni zabo ezahlukene,” esho.
Uthembise abantu ukuthi bazoyithokozela imiklomelo abazoyizuza kulo mncintiswano njengoba izomenyezelwa ngokuhamba kwesikhathi.
Kulabo abazimisele ngokungenela lo mncintiswano, inhlolokhono yasethekwini izoba mhla zingama-20 kwephezulu emoses Mabhida Stadium.
Amasango azovulwa ngehora lesi-7 ekuseni.
Kunxuswa abantu ukuba basheshe bafike kwazise abazofika ngemuva kwasemini bebade (12:00) ngeke besavunyelwa ukungenela. Amajaji alo mncintiswano ngujamie Bartlett, Shado Twala nodj Fresh.