Icwecwe elinamanoni kalebo Mathosa

ISIKHONDLAKHONDLA senkampani esabalalisa umculo, i-universal Music, sikhumbule isilomo somculi ongasekho, ulebo Mathosa, ngokudedela icwecwe elihlanganisa izingoma zaso.

Ulebo udlule emhlabeni eminyakeni eyishumi eyedlule ngemuva kokubandakanyeka engozini yemoto.

Ngokusho kukadarham Suraj, oyisikhulu esiphezulu kule nkampani, inhloso yokukhipha leli cwecwe lezingoma zikalebo wukuba babone kuyisikhathi esihle ukuba baqinisekise ukuthi imisebenzi yakhe kayishabalali.

“Kuyiqiniso esingeke siliphike ukuthi ulebo ubengumculi onethalente eliyisimanga futhi oyibekile induku ebandla, ngakho imisebenzi yakhe akumele iphelele emoyeni kodwa nentsha ekhulayo kumele yazi ngaye nangezingoma zakhe,” kusho usuraj.

Uthi futhi umculo kalebo usuyatholakala nasezinkundleni zobuchwepheshe ezidayisa umculo.

“Ulebo udlule emhlabeni kungakabi mandla ukudayiswa komculo online ngakho kusele kithina njengenkampani ukuba siwu- fake umculo wakhe kulezi zinkundla njengoba uma kukhona abazithandela ingoma ethile kalebo bezoyithola ngaphandle kokuba baze bathenge i-album egcwele,” kuchaza usuraj.

Uthi njengenkampani basezinhlelweni zokufaka nezinye izingoma zabanye abaculi abangasekho kuzona lezi zinkundla ezidayisa ngomculo online.

“Abaculi abafana nobrenda Fassie, Jabu Khanyile, simatasa ngezingoma zabo ngoba umculo wabo awubuni futhi kumele sihambisane nesikhathi samanje ukuze singasali ngaphandle ekumaketheni abaculi bethu,” enaba.

Ulebo uzakhele udumo eseqenjini ebelishisa izikhotha eminyakeni yama-90’s ngezingoma nangemidanso yalo, iboom Shaka.

Leli qembu beligabe ngaye ulebo, uthembi Seete, Theo Nhlengethwa nojunior Sokhela kanti phakathi kwezingoma ezidlisele ogageni kubalwa esihloko sithi, “It’s About Time” nethi “Thobela”. Kanti kwawakhe amanoni ujuxuzise umphakathi ngezithi “Au Dede”, “Brand New Day” “Nothing Can Stop The Feeling” nezinye. lucky.cain@ilanganews.co.za