Konke okuhle nomusa kuyangilandela
IMPELA okuhle nomusa kuyangilandela, imihla yonke yokuphila kwami. Lawa ngamazwi ashiwo ngudavide embhalweni wakhe lapho etusa khona uthixo njengomelusi omuhle. Lawa mazwi akhombisa ukuba nesiqiniseko sezinto ezinhle ezimehlelayo ukuphila konke kwakhe futhi awuphawu lokubonga nokuba nesiqiniseko sikamelusi ongakhohlwa yizimvu zakhe, kunalokho azilungiselele okuhle emihleni yonke yokuphila kwazo.
Ukuba nesiqiniseko sezinto ezinhle eziza empilweni yakho ngenxa yobuhle bukamelusi nokwethembeka kwakhe okungaguqukiyo kuveza isithombe esihle sezimpawu zikamelusi nokuthi uba kanjani yithemba lezimvu zakhe.
Okunye okutholayo kulo mbhalo wale nsizwa wukuthi noma nginga- hamba esigodini sethunzi lokufa kodwa angesabi lutho, kunalokho ngima isibindi, ngokuba ngiqinisekile ukuthi umelusi unami njalo futhi nguyena onamandla okukwazi ukungilwela uma kwenzeka kuvuka izimpisi zasesigodini sethunzi lokufa.
Okunye esikufundile kudavide nalo malusi amvezayo kulo mbhalo wakhe wukuthi uyaqinisekisa ukuthi awesweli lutho, uyakondla ngezindlela namasu okuphila bese ekupha namandla okukwazi ukumelana nanoma ngabe hlobo luni lwezinselelo ezivukayo endleleni yokuphila.
Simuzwa ethi, "ujehova ungumelusi wami, angiyikweswela lutho", bese eveza ukuthi uyamhola ezindleleni zokulunga, ngenxa yegama lakhe.
Isifundo engisitholayo kulo mbhalo ngesokuthi sinomelusi othembekile, osinakekelayo, nosikhathalelayo futhi osilwelayo izimpi. Umelusi wethu uhlale ekhona njalo, akozeli akabulali ubuthongo futhi uma nathi lapho isitha sisivukela khona, asiphe amandla okukwazi ukubekezelela ubuhlungu bezinto ezike zisehlele, ahlale njalo esophula kwizinhlobonhlobo zogibe lwabacuphi, enze amasu okuba noma isimo sempilo siguquka silinga ukusithela phansi kodwa enze amasu okuba unyawo lwethu lungasheleli yingakho lithi leli lizwi akavumi unyawo lwethu lushelele.
Iqiniso wukuthi wonke umuntu ozelwe ngowesifazane uyafikelwa yizikhathi ezinzima ezifana nalezi nodavide ahlangabezana nazo kodwa into emenza ame wukwazi ukuthi asizidalanga, asizilethanga emhlabeni kodwa sabunjwa ngokukhethekile ngezandla zakhe futhi saphiwa namandla okukwazi ukulawula nokubusa phezu kwakho konke okungaphansi komthunzi welanga.
Uma kwenzeka ufikelwa yizikhathi zokuphelelwa yithemba, khumbula namhlanje ukuthi kukhona amandla esitshelwe ngawo, angewona ajwayelekile kodwa okuthiwa avela lapho kungabonakali khona, okwethu wukuwasebenzisa, nokukhuluma ngawo phezu kwanoma yisiphi isimo esibhekana naso emhlabeni.
Kukhona konke okuke kwakwehlela, londoloza nanka amazwi engqondweni yakho, lawa athi, "konke okuhle nomusa kuyangilandela, imihla yonke yokuphila kwami".
Ukuwakhuluma lawa mazwi esimeni sakho, kuyayisiza ingqondo yakho ukuba iqunge isibindi futhi isebenze kube sengathi yiyona enamandla okushintsha leso simo.
Lokho nje kukodwa kwenza ukuba ukhuthazeke ukuya noma ngabe kukuphi lapho okumele uye khona ngaphandle kokuzibuka wena ukuthi umncane kangakanani kunaleso simo.
Empeleni ukutshela ingqondo ukuthi wena ungaphezu kwesimo nokuthi unamandla ngaphezu kwaso kwenza ukuba ube nempokophelo engenqandwe muntu kunalokho ulwe, ukwazi ukunqoba izimpi noma ngabe bezingakanani ngokwesilinganiso.
* Abafisa ukuphawula noma ukuzwakalisa imibono yabo ngale ngosi, bayacelwa bathumele kwiemail ethi:abombuso@gmail.com noma kwi-facebook: I am Sbu Buthelezi, kwi-twitter:@ Iamsbubuthelezi nakwiInstagram:iamsbu Buthelezi