EZINDABENI EZITHINTA UKUBULALA ENDIMENI KAMASKANDI NOKUSHAYWA KWENTATHELI YELANGA NGUMTHANDENI "IGCOKAMA ELISHA" MANQELE, NANSI IMIBONO YABAFUNDI KU-WHATSAPP:
NGIBABAZA ubuwula obukhungethe thina ndlu emnyama ngoba njalo lapho esihlangene khona kuchitheka igazi. Umculo kamaskandi kawuyichazi yonke le nto osuyiyona manje. Mawuzobheka ngeso elibanzi abaculi bakamaskandi bangosopolitki ngokolimi abalukhulumayo. Sigqoka umfaniswano, siyavota, ingasaphathwa eyemicimbi yakhona. Kudlaliwe ngabantu bakithi!
Kancane kancane kunomcimbi, kudliwa imali yabantu bakithi mahhala bevele bedonsa kanzima. Ngeke lungasuki-ke uthuthuva ngoba njalo la kuhlangenwe kuyaklolodelwana. Nabaculi bakhona bayopha emlonyeni benjalo nje, ekugcineni bathole ingqobe uma abavuni sebehambe nesamba semali.
Ngabe kungcono ukuba nale mali okuvotwa ngayo inikezwa lowo osuke ewinile ngabe kuyezwakala. Uhulumeni makangenelele kwehliswe le micimbi enguchithi saka, ongayazi ukuthi ngeyani, kungenjalo itshe limi ngothi Nkombose kababa. Intatheli mayenze ekuqashelwe nayo, ingagxambukeli ezinxushunxushwini zabaculi bakamaskandi.
Lokhu ngizogadla ngibhekise kumthobisi Sithole, ujobe, ngala mazwi akhishwa wukhuzani Mpungose ethi: “Uyabatshela yini abantu ukuthi nguyena umthobisi owakufaka emcimbini obusejozini ngo-2014 wase umcela eceleni wathi akabhale ukuthi abalandeli bacele impinda.”
Kule nkulumo kucaca ngokusobala ukuthi akasawenzi umsebenzi wakhe umthobisi wokushicilela ulwazi nolimi olungachemile, usengene shi. Noma ebhala ngegcokama Elisha ulimi lwakhe kaluqondile kahle, luchemile futhi luyezwakala. Masiwathande amaciko akithi, siziqhenye ngobubhinca bethu kodwa kungashaywana kufe abantu bakithi befela uthando nje lwamaciko.
Kuyamangaza, kuyethusa ukuthi umaskandi manje usunezidumbu phansi, okusiphoxa nakwezinye izizwe ezisibona ubuwula. Hlanganani mazulu nibumbe isizwe sikaphunga nomageba, phansi nezikhali, masithelelane amanzi. Mayiduduzeke nemindeni eshonelwe. Yimpi yengoma lena bakwethu. Ntuthuko Mabhavane Shange, Eshowe EVUMA
MAKUKHUZWE le nto yodlame emculweni kamasikandi, kungafani namaqembu asenaturena alwayo. Khuzani abalandeli bakamaskandi, kungaliwa. Nampa nje oshwi nomtekhala kepha bayaphumelela, bakhona nophuzekhemisi nohhash’ Elimhlophe asebehlalile kule ndima yomculo, pho laba kungani bebona sengathi bazophumelela uma belwa? Bongah Pondoh Gazu, Enkandla EZINYOSI
CHA, impela kayemukelekile into eyenziwe yigcokama kodwa selibekezele isikhathi eside bo umthobisi Sithole ekhwela ezehlela. Kusicacele ngokusobala thina balandeli ukuthi akakaze ambeke kahle umthandeni ujobe, akekho ongaboni ukuthi umthobisi ucheme nokhuzani wangakubo. Philasande Majola, EZAKHENI
NGIFISA ILANGA lisenekele ukusuka nokuhlala kwengxoxo yegcokama nomthobisi ukuze sazi ukuthi isisusa siyini ngoba kangethembi ukuthi umthandeni uvele wamshaya nje engashongo lutho okamondise. Bese ngicela ukuthi nalo ILANGA likhumbuze izintatheli ukuthi zona okwazo wukwenza umsebenzi ngendlela engenakuchema, kube nohlelo olungaphakathi KWILANGA lokubuka indlela izintatheli ezibhala ngayo nezikhuluma ngayo nabantu uma kukhona ezifisa ukukuthola zikudlulisele esizweni. Ngaphambi kokuba nigxeke umthandeni naye umthobisi mnukeni amakhwapha. Efika nje qathatha emculweni umthandeni, umthobisi wabhala ukuthi uyinkabi ubulala abantu. Kuthe kusenjalo kwaphuma ukuthi uyisidakwa, ulala nomahosha. Nezindaba zokuthi umthandeni ushaywe ngudsd zaphuma KWILANGA, zibhalwe nguyena umthobisi. Kangazi noma uqashelwe ukucoshela okuqondene nomthandeni kuphela yini. Baphathi BELANGA, yibuke- ni le ndaba, kunempi ekhona la. Umfundi WELANGA
UMTHOBISI umeyisa ephephandabeni umthandeni, lifundwe yizwe lonke. Kwelangomsombuluko nje emuva kwesehlo sasecurries Fountain umthobisi wathi abalandeli begcokama bazame ukuphazamisa ukhuzani, esukela aluhlaza amanga, kube kungabalandeli bakakhuzani abasuka ngamajubane bejabulela iqhawe labo baze bagibela esteji. Ehluhluwe ungizwe washaya umlandeli kamthandeni ILANGA langasho lutho. Uma izintatheli zichema isidana, zizoshaywa ngoba siyazi ukuthi ukhuzani uke waba yinxusa LELANGA, ezanyelwa yibo omthobisi nomphathi wakhe wakudala. Umfundi WELANGA, E-CLERMONT
MANGIKHUZE le nto eyenziwe yigcokama Elisha. Ndodana, kakubona ubugcokama lobu obenzile, ukushaya intatheli ngempama emngcwabeni. Wubundlavini lobo, kawunikanga umngcwabo isithunzi sawo nawe futhi wazehlisa isithunzi. Okwenzile kakukhombisi nokuthi ufundisiwe, kukwenza ube wuphuma silwe okomuntu owalusa kakhulu eqhathwa wafunda ukuthi insizwa mayikunyathelile ungakhulumi kodwa ulikhuze phezulu libe bomvu ikhanda. Ngiyakucela Gcokama Elisha, awufunde ukuzehlisa ube phansi sikukhuphule thina njengabalandeli bakho abakuthandayo, ungafundisi intsha udlame. Philisiwe Khuzwayo, enanda OHLANGE
ISELULEKO sami wukuthi kufanele izikhulu ZELANGA zihlanganise umthandeni nomthobisi ukuze le nto iphele ngoba ijiyile futhi kakusiyo eyamanje. Igcokama kumele lelulekwe lingaphindi lokhu elikwenzile. Umfundi WELANGA
IGCOKAMA lisebenzise indawo engafanele, bekuyokhaliswa umndeni wakwaxulu laphaya. Lokhu elikwenzile belingakwenza ngolunye usuku. N J Luthuli