Abawona amaciko laba baculi, ophakimpi
IDINGA ukufakelwa izipopolo indaba yabala baculi bakamasikandi besimanje. Asazi noma kusabafanele yini ukubizwa ngamaciko noma kufanele sibabize ngamashinga, ophuma silwe. Sisebenzisa igama lamashinga ngoba sibabona bengabantu abanukelwa yimpi ekhaleni ngaso sonke isikhathi. Wonke umuntu olandela umasikandi uyazi ukuthi le genge, ikakhulukazi efikayo kulo mculo, isebenza ukuqhamuka nezingoma ezisusa impi. Umculo wabo awusagxilile neze ekujabuliseni abantu kodwa usugxile ekulweni izimpi zabo bodwa. Akubona-ke ubuciko lobo.
Empeleni nje lo mculo wabo wokuchukuluzana awukhombisi buciko. Lokhu abakwenzayo kusenza sicabange ukuthi abanye bangene emculweni ngenxa yendlala, bazama iphalishi ngomculo hhayi ngoba kuwubizo.
Indlela laba baculi abaziphethe ngayo ikhombisa ukuthi banemilomo emanzi, bakhuluma kuze kweqe. Ingozi wukuthi le milomo yabo emanzi iqhatha abantu. Ngolwasemzini singathi nje “they are not genuine artists”.
Kuyadabukisa nje ukuthi lobu buqaba nokungcola okwenziwa ngabaculi bakamasikandi bungcolisa isizwe sonke samazulu. Kuyadabukisa futhi nokuthi indlunkulu kazulu asiyiboni ithatha izinyathelo ezinqala zokunqanda ukungcoliswa kwesizwe sayo.
Siyafisa ukuyizwa iphawula kabanzi ngalo mkhuba wabaculi bakamasikazi oqhatha abantu.
Kodwa-ke nabo abantu mabayeke ukuba ngamathatha, bangakuvumeli ukuqhathwa yizingane ezingamahlongandlebe. Lezi ngane seziphendule umculo kamaskandi ipolitiki.
Le ndaba yamaqembu qembu emculweni kamaskandi yinto entsha, esingayazi ukuthi ichaza ukuthini. Bakwethu, umuntu uma efisa ukuba wusopolitiki, akaphumele obala nje, angafaki ukufaka ipolitiki nalapho ingadingeki khona.
Iziteshi zemisakazo nazo sekufanele zenze okuthile ngalaba baculi abahlale bengqofana. Le nto yabo ikhombisa khona ukuthi bona abaculi no-producer babo kabanabo ubuciko bomlomo, bayehluleka wukubhala umculo okhuluma nesizwe futhi owakhayo.
Siyisizwe, sonke sihlalelwe wumsebenzi wokulekelela ekuqhubekeni nokwakha isizwe esinokuthula noxolo futhi esihlangene. Sinomsebenzi wokukhuza inkinga esibhekene nayo yodlame lokucwasana ngokobuzwe nangokobuhlanga.
Lezi ngoma zanamhlanje zisishiya nombuzo futhi wokuthi sekwaphelelaphi ukuba abaculi baqhamuke nezingoma ezimnandi zothando, nezikhuluma ngezinto ezenzeka empilweni imihla ngemihla kanjalo nalezo ezakha isizwe.
Abaculi abaningi abahlonishwayo, bathole ukuhlonishwa ngeqhaza abalibambile ekudaleni ukuthula ezweni, nasekulekeleleni ekulweni nokuvikela amalungelo abantu.
Ungacabangi ukuthi kukhona umuntu ozokuhlonipha ube uwumdlwembe ophehla udweshu ngaso sonke isikhathi.
Kungenzeka ukuba abanye bakushayela ihlombe ngokugqofana nabanye abaculi kodwa lokho akusho ukuthi bayakuhlonipha.
Abaculi sengathi bengakhumbula ukuthi ukuze uhlonipheke emphakathini kufanele uqale uzihloniphe wena. Ngeke bakuhloniphe abantu uma wena qobo ungazihloniphi.
Kufanele ubonakale umehluko phakathi kweciko noskhotheni, umuntu ohlala epayipini. Ungathi uyiciko kodwa izenzo zakho zibe zifana nezikamapayipana.
Lezi zingane seziphendule umculo kamaskandi ipolitiki. Ungacabangi ukuthi kukhona umuntu ozokuhlonipha ube uwumdlwembe.