Ufihle induku emqubeni uceleste
USOMAHLAYA uceleste Ntuli uthi ngaphambi kokuba kufike igama elithi ‘ junk status’ okuyisimo somnotho esibheda kakhulu, abantu abamnyama bese kukudala bephila ngaphansi kwalesi simo.
Lo somahlaya ophinde abe ngumlingisi umatasa nomjikelezo wamahlaya akhe obizwa ngeblack Tax okuyi-one Woman Show. Uthi ukhethe ukusebenzisa leli gama ngoba wonke umuntu (omnyama) uyayikhokha le ntela ( black tax) futhi cishe bonke abantu bayazi ngayo.
Uthi wonke amahlaya azobe ewaqhulula azobe emayelana nesimo somnotho sakuleli nasemhlabeni wonke.
Uthi amahlaya azobe ebheka ukuthi kusho ukuthini ukuba kwi- junk status.
“Sizobheka ukuthi kwenziwe yini ukuba abantu abamnyama bagcine bezithola bephila ngaphansi kobubha obungaka, nokuthi singayishintsha kanjani le nto ukuze impilo ibe ngcono ezizukulwaneni ezizayo. Amahlaya ami axoxa indaba. Siphila esikhathini la kumele khona sizazi njengamaci-ko ukuthi simi kuphi,” kusho yena.
Uceleste usanda kuveza ukuthi uzothatha ikhefu emdlalweni owuchungechunge Isibaya otshengiswa kumzansi Magic. Uthi uthathe lesi sinqumo ngenhloso yokugxila emahlayeni.
Uthi yize ezobe ekhuluma izinto ezibucayi ngale ndlela kodwa uzozikhuluma ngendlela enamahlaya njengenjwayelo.
“Abalandeli bami mabalindele ukuhleka baze baphathwe yizisu,” kulanda yena.
Uthi amahlaya akhe azobe ephelezelwa wumculo omnandi angathandanga ukuwudalula ukuthi ngokabani, wathi ufihle induku emqubeni. Omunye wale micimbi kaceleste uzobe ungomhlaka 25 August emfolozi Hotel Casino empangeni. Ngomhlaka 29 July
uzobe esethekwini.