Bebengaziboni becula isicathamiya
KUYENZEKA kwesinye isikhathi ingoma idume idlule umniniyo, abanye bagcine bengamazanga oyiculayo.
Akuyona-ke into embi leyo ngoba kuchaza ukuthi wumsebenzi ozikhulumelayo. Ngakolunye uhlangothi kumnandi ukwazi ukuthi leli phimbo ngelikabani. Kulokhu sikhethe ukuphola nezinsizwa ezisencane zeqembu ithee Legacy. Siphole nazo ngasolwandle ukuze sixoxe sibe sishaywa wumoya oheleza kamnandi.
Abantu abebebabona bakhombise okukhulu ukubathokozela, bencoma umsebenzi wabo bengaphezi. Nazo lezi zinsizwa zikhombisa ukubathanda abantu futhi aziqhenyi, njengoba zigcine sezibaculela bukhoma, mahhala abalandeli bazo.
Engikutholile wukuthi ukujatshulelwa lapho behamba khona bakujwayele. “Kuyasijabulisa uma abantu bewuthokozela kanjena umsebenzi wethu. Umculo wethu wumculo ohambisana nemizwa, umculo wothando yingakho izintokazi zisijabulela ngale ndlela.
"Okunye-ke, thina singamadoda akholwayo, athandazayo futhi siyawuhlonipha umsebenzi wethu. Siyakuqonda ukuthi osisi basuke beqhutshwa yinjabulo hhayi ngoba behlose okuthile,” kusho ujabulani Mthembu ophinde abe ngumsunguli waleli qembu.
I-LEGACY YINGUNAPHAKADE Echaza ngegama laleli qembu umthembu uthe: “Leli gama linomqondo ojule kakhulu. Lichaza into eyophila kuze kube ngunaphakade, into engenakushabalala. Ngisho izizukulwane eziyolandela thina ziyokwazi ukuthi kwake kwaba neqembu okuthiwa yithee Legacy."
Ujabulani uthi into eyenza ithee Legacy ithandwe kangaka yingoba icula isicathamiya sesimanje.
“Abantu abebesigqugquzela futhi ebesibukela kubona yiladysmith Black Mambazo kodwa thina sifike safaka isigqi sesimanje ukuze umculo wethu ukwazi ukuhambisana nesikhathi futhi ulalelwe yiwona wonke umuntu. Ngamanye amagama isigqi sethu si- contemporary and cosmopolitan,” kushibilika ujabulani ngesingisi.
Uthi into eyenza kube lula ukufaka isigqi sesimanje yingoba baqhamuka kwizinhlobo zomculo ezahlukene njengoba beyisihlanu. Ujabulani ubengumuntu wer&b futhi engaziboni enza olunye uhlobo lomculo.
UBENGAZIBONI ECULA ISICATHAMIYA
“Bekungakaze kungifikele emqonqweni wami ukuthi ngingacula isicathamiya ngimncane kanjena. Empeleni ngangizitshela ukuthi umculo wesicathamiya ngowabantu abadala,” kusho ujabulani.
Uma uzwa amaculo afana nowena Wedwa, Sthandwa Sami, Hlala Nami kusuke kungumsebenzi wezandla zakhe-ke lowo. Empeleni nguyena obhale wonke amaculo akwi- album yabo. Ikhono lakhe libuye lagqama kakhulu kule filimu ethi Wonderboy njengoba ebhale cishe zonke izingoma ezikule filimu.
Uma uzwa usigqi sezayoni, u- beatbox, kusuke sekungusimphiwe Skhakhane-ke lowo.
“Bengigxile emculweni wokholo, kakhulukazi umculo wezayoni. "Umsebenzi wami wukulalela ingoma bese ngifaka i- harmony noma isigqi esipholile engomeni. Ngibuye ngenze i- beatbox, timing, i- tempo
nesifutho,” kuchaza usimphiwe.
Uphilani Duma yena ubecula i- kwaito. Nguyena owenza kube nale vibe enokudansa phakathi. “Bengenza i- kwaito kodwa uthando lwesicathamiya lwanginqoba. Lolo thando lwe- kwaito lusekhona, yingakho kwezinye izingoma uzothola kunomuzwa we- kwaito.
"Uzomangala uma ngikutshela ukuthi obaba bethu sonke la eqenjini babecula isicathamiya. Kwamane kwaziqondanela nje,” kuchaza uphilani.
Uma uzwa leya nhlansi ye- jazz
enokudlala ngephimbo, elishintsha kusuka kwi- soprano kuya kwi- bass, libuye lithi alto, kusuke sekungenelele ukhanyisani Mazibuko-ke lapho.
“Ngikhule ngithanda umama ubusi Mhlongo, ujabu Khanyile, ucaiphus Semenya, ubrenda Fassie nolebo Mathosa. Ukufaka i- jazz kwisicathamiya kwaba wumqondo ophusile ngoba kuyawuphucula futhi kuyawukhulisa lo mculo,” kuchaza ukhanyisani.
Owokugcina ngu-emille Ngcobo nokunguyena onekhono lokubhala aphinde ahaye inkondlo engomeni. “Umsebenzi wami wu
kwenza izinkondlo engibuye ngizihaye phezu kwengoma. Ngiphinde ngenze no- bass. Akuvamile ukuthola ingoma ehambisana nenkondlo kodwa thina siyakwenza. Lokhu kwenza ingoma ihlabahlose, ingene nasemizweni yabantu,” kusho u-emille.
Amalunga aleli qembu asuka enanda, Ntuzuma nakwamashu, (INK area). Ahlangene ngowezi-2013 kodwa i- album aze ayikipha ngonyaka odlule ngomfumfu (October).
U-emille uthi: “Bekukhona ukwesaba kodwa sazitshela ukuthi sizoqhubeka ngoba yinto esikholelwa kuyona le. Asizisoli ngokushiya kwethu imisebenzi ngoba sizinikele kulo mculo futhi siyazazi ukuthi sisuka kuphi nokuthi siyaphi,” kusho u-emille.
Izinyembezi zimane zagcwala amehlo kubona uma sifika odabeni lokuhlangana kwabo.
“Sishiye phansi imisebenzi sagxila emculweni ngoba besinethemba lokuthi yonke into izohamba kahle. Sonke besisebenza, sinemindeni esiyondlayo kodwa sashiya phansi sagxila emculweni,” kuchaza uphilani.
Uthi wakhala mi izinyembezi ngesikhathi benqoba umncintiswano wesing Off South Africa nokuyilapho bawina khona isamba sika-r250.000
“Ngangikhaliswa yinjabulo nokukhumbula indlela esiyihambile. Siyazi ukuthi mningi umsebenzi osasihlalele kodwa asinalo uvalo ngoba umphakathi uyasithanda.”
Kuyimanje, ithee Legacy inethemba lokuthola indondo yebest Remix of the Year kowamaSouth African Music Awards (Sama).