Ibambeni ngezimpondo maciko
IBAMBE ngakho baculi nani maciko nabobonke abasendimeni yebhizinisi lomculo. Kusihlabe umxhwele ukubumbana kwenu ningamaciko ngesikhathi nenza inhlabaluhide nilibangise ezindlini zokusakaza kwaSABC egoli nasethekwini niyonxusa ukuba umculo wenu udlalwe ngokuthe xaxa.
Besesiqala ukushaywa luvalo thina esesingoguga sithebe sicabanga ukuthi sizele amanina oqobo ehlulwa ukulwela amalungelo awo kanti phinde sishaye phansi kwashunqa uthuli, sithi ayingabe isahlehla le nqola yalo mkhankaso, ayize ifinyelele nakuyo yonke imisakazo yemiphakathi nazo zonke iziteshi zikamabonakude eningizimu Afrika.
Engiqonde ukukusho wukuthi sekumele nisukume futhi baculi niyobhekana ngqo nempi ekhaleni layo. Inkunzi esenibhekene nayo manje iyahlaba kepha kumele niyibambe ngezimpondo nisho isaga sakwazulu esithi “oliva! Ji”, niyidudule ize iwe ngophondo.
Leyo yimpi yamasela antshontsha umculo wenu awudayise udede ngentengo ephansi. Lawa masela awehlukene nenyoni ukhozi lona olulinda izikhukhukazi zichamusele bese luhlwitha amatshwele, lundizele phezulu luwasobozele.
Ningawahlomekeli lawa masela ndini aseke abagila abaculi abafana nolusanda nophuzekhemisi. Bobabili laba baculi amasela abavulela amacala okuthi bawahluku- mezile baboshwa ngoba nje bethathe amacd abo edayiswa ngomgunyathi bawalahla.
Kusobala ke ukuthi ingalo yomthetho lawa masela ayigqabele, nani baculi sithi awumbiwa ndawonye, kuzomele uma nihlela umbhikisho wokuqwashisa umphakathi ngokwebiwa komculo wenu nihambe nawo amaphoyisa aniphelezele niyowakhombisa emarenke lapho udayiswa khona.
Sekuyocaca ngalolo suku ukuthi ngubani isela phakathi kwabaculi nabadayisa umculo ngaphandle kwemvume yabaniniyo.
Sekukhona nophiko oluhloni- shwayo emaphoyiseni olubizwa ngoklebe, asingangabazi ukuthi uma lungajutshwa ukulwa nalesi sihlava singaphela ekuseni kodwa inkinga wukuthi abaculi baleli zwe babhekwe yisambane, konke okwabo kubukelwa phansi, akukhonkothi ngisho isimaku uma kukhala bona.
Lo mkhankaso udinga ukuxhasana kwabaculi bebodwa, bagibelisane ezimotweni basizane nangokheshe wokugibela amatekisi ngoba sekucacile ukuthi iningi labaculi selafofobala emakhaya alisawazi nomgwaqo obheke edolobheni angithi phela into yokuthenga ayisabonwa, namahloni athe bhe nesaba ukuthi bazokhombisana ngani abantu.
Noma lo mkhankaso ungabukeka ungabalulekile kubaculi abakhona manje kepha isizukulwane esizayo siyodla izithukuthuku zabazali baso, abaculi bahlale besemlandweni omuhle.
Konke lokhu esikhuluma ngakho kakusho lutho kumuntu ongasebenzi ngomculo, kodwa kwabaphila ngawo kungena kugxile ezinhliziyweni.
Kukhona esibaziyo abadayisa imfuyo yabo befuna ukuqopha, abanye amabhizinisi, babodwa abahanjelwa ngamakhosikazi nabayeni ngalo mculo kanti abanye sihamba phezu kwabo, ngakho lolu wudaba olubucayi nokumele lusukunyelwe. Sithi: “Vuk’ ukuzithathe mculi.”