ITHINTA INDABA EMQOKA YOKUCWASANA INCWADI INKEMBA YOBUNSIZWA
NAKUBA Inkemba Yobunsizwa iyindaba ekhuluma ngothando, kodwa ngamafuphi ngolukakhwini singathi iyi national project ngenxa yobumqoka bomshikashika osahlalele abantu baseningizimu Afrika ukuba bawusebenze ukuyitakula obhukwini ephuma kulona lokulawulwa ngemithetho ecwasa ngobuhlanga iminyaka ngeminyaka.
Lokhu kuvela zisuka nje usafunda isandulelo sayo le ncwadi. Umlobi ujabulani Matthew Mngadi uveza ukuba mnkantshubomvu kwezokubhalwa kwezincwadi njengoba esebenzisa indaba yothando ukulwa lempi.
Uthi esebenzisa indikimba yothando kodwa abe ethinta izingxenye zempilo ebezithinteka ngenxa yokusabalala kobandlululo. Umongo wakhuluma ngakho umlobi kule ncwadi, okuyinkinga yokujula kobandlululo okuthathe eside isikhathi lusemthethweni, usuvele wagqama kakhulu kulezi zinsuku njengoba kusabikwa namanje izehlakalo ezimbi zokucwasana phakathi kwezinhlanga ezahlukene.
Ngeshwa lencwadi ayikabi khona ngezinye izilimi, okwenza intshumayelo izwakale kwabakhuluma ulimi ebhalwe ngalo kuphela kodwa inkinga ibe idlangile nakwabakhuluma ezinye izilimi okudingeka nabo balizwe leli vangeli elikule ncwadi.
Yona lencwadi esukela othandweni lomfo wasemaphephetheni, umnqobi Gwala, othandana nentokazi yebhunu umarlene Myburgh ibuye iveze olunye uhlangothi lapho intokazi yomdabu enguzamaswazi ithandana no David Mcdavit oyisikotshi.
Kakugcini ngalaba njengoba umlobi eveza nezinye izinhlobo zothando njengalolo olusematheni namanje emphakathini waseningizimu Afrika obufana novalelwe embizeni yonke leminyaka uma sekuza kwezamalungelo abantu jikelele.
Umfundi angazitholela nokunye okuningi okuyizimpambosi zempilo okwenzeka kule ncwadi umlobi akuthintayo ngokusebenzisa izindaba zothando kubalingisi ukuze akuveze.
Phakathi kokunye kwakho wuthando phakathi kwezinhlanga ezahlukene okukade kungavunye- lwe phambilini, ukuthandana kwabobulili obufanayo, ukukhonga nokulobola, ulwazi lwezilimi zomdabu, yizinkolo namasiko, nokunye okuningi.
Nokho ithuba likamnqobi lokuveza eyakhe inkemba yobunsizwa aligqashuli kahle lithi qekelele njengokulangazela komfundi osuke eseyizwile eyobunsizwa buka David owatakula intombi kamnqobi.
Phela njengomuntu onolwazi lomkhalambazo, ikarate phela, bekungaba mtoti kuthi cosololo ukuba umnqobi wayesivove inkani ngayo ikarate leso siqhwaga ababeboshwe naso, esasifuna ukudlwengula udavid.