I-SUNDOWNS IPHENDULE I-PSL IHAWU
IMAMELODI Sundowns iveze isizathu ekholwa wukuthi yisona esenze yaphunyukwa yisicoco seAbsa Premiership kule sizini.
Ibidvest Wits isiyizingqwele ezintsha zeligi emuva kokuba iguqise ipolokwane City ngo-2-0 ngoLwesithathu ebusuku ebidvest Stadium, egoli.
Isithathe kwisundowns lesi sicoco emuva kokuba ezikapitso Mosimane zibambane nemaritzburg United ngo-2-2 ngalo ulwesithathu ebusuku elucas Moripe Stadium, e-atteridgeville.
La makilabhu yiwona abesejahana ngalesi sicoco kodwa yagoba idowns obekufanele noma kanjani iwunqobe lo mdlalo weteam of Choice ukuze kucace izingqwele ngemidlalo yokugcina yeligi.
Uthulani “TT” Thuswa wezokuxhumana kwidowns, uveze isizathu athi yisona esenze behluleka wukuvikela isicoco seligi. Uthi ukuhlelwa kwepremier Soccer League (PSL) ukuhambisana namaligi ase-europe hhayi awase-afrika kubakhinyabeze kakhulu njengoba bedlala nakwiCaf.
“Sizamile ukusilwela isicoco sethu seligi kodwa kwaphela wona amandla kubadlali bethu ngemizuzu yokugcina. Abadlali bethu bakhathele. Sesidlale amasizini amathathu elandelana bengaphumuli ngenxa yemidlalo yecaf, eyeligi neyezinkomishi zakuleli.
“Namanje ngisasho ukuthi iligi yethu kayihlelekile ngendlela, iphambene yingakho sizithole sikulesi simo. Bheka nje ukuthi i-orlando Pirates idonse kanzima emuva kokuba idlale yonke imiqhudelwano yaze yafinyelela kowamanqamu wase-afrika.
“Kuze kube yimanje ipirates isadonsa kanzima ngoba iligi yethu iphambene neyamanye amazwe ase-afrika yingakho kunzima,” kusho uthuswa.
Uthuswa ukhuluma kanjena nje, umqeqeshi wesundowns upitso “Jingles” Mosimane, uthi ngesizini ezayo kungenzeka aphoqeleke ukudlalisa iqembu lemultiChoice Diski Challenge (MDC) emiqhudelwaneni yezinkomishi zakuleli.
Sizamile ukusilwela isicoco seligi kodwa kwaphela wona amandla.