BAZIKHALELA KU-KAIZER JNR ABANGAMFUNI UKOMPHELA
ABALANDELI bokuqina bekaizer Chiefs banqume ukulubika kukaizer Motaung Junior oyindodana encane kakaizer Motaung ongumnikazi wale kilabhu udaba lokungamfuni kwabo usteve “Mphathi” Komphela ongumqeqeshi wezimpofana.
Ichiefs isiyinhlekisa kubathandi bakanobhutshuzwayo baseningizimu Afrika njengoba isigijime amasizini amabili inganqobi nkomishi. Abalandeli bafuna ukomphela achithwe kwazise akanawo umlando omuhle wokunqoba izinkomishi.
Omunye wabalandeli bokuqina bale kilabhu ngeledlule utshele leli phephandaba ukuthi bahlongoza ukuyiduba imidlalo yale kilabhu kwazise kayisabajabulisi ngalutho.
Lo mlandeli uphinde washayela leli phephandaba walitshela ukuthi sebenqume ukulubika kukaizer Jnr udaba lokungamfuni kwabo ukomphela ngoba bakholwa wukuthi nguyena ozokwenza umehluko.
“Umotaung Jnr nguyena esesimthatha njengomphathi wekilabhu ngoba ubobby (oyindodana endala kamotaung) uma simtshela into uyathathela, uyaphuza ukuthatha izinqumo. Njengoba sesilubike kukaizer Jnr nje sithemba ukuthi kuzocaca maduzane, umehluko uzobonakala.
“Kasisamdingi ukomphela, sesanele nguyena. Buka nje sesishaywa nayiplatinum Stars. Sekudlule inqwaba yemidlalo singanqobi, kuyacaca ukuthi uma ikilabhu igcina lo muntu nangesizini ezayo kuzokuba njena,” kusho lo mlandeli ocele ukuba lingadalulwa igama lakhe.
Nokho umotaung Snr ucashunwe kwabezindaba ethi usameseka ukomphela. Ucashunwe ethi impumelelo kayenzeki ngobusuku obubodwa, kuyabekezelwa. Nobobby, oyimenenja yechiefs, ucashunwe ethi ugavin Hunt unqobele ibidvest Wits iligi ngesizini yakhe yesithathu ekule kilabhu.
Kuthintwa ubobby ukuphawula ngalolu daba lwabalandeli nokaizer Jnr, uthi abalandeli mabehlise imimoya isizini vele isiyaphela.
“Ngeke sithathe izinqumo isizini iphakathi. Lokho ngeke kusenzele lutho kunalokho kuzosibuyisela emuva. Njengoba bengishilo nje sizokuba ne- workshop lapho sizobhunga khona ngakho konke okwenzeke ngale sizini engikholwa wukuthi yilapho kuzothathwa khona izinqumo,” kusho ubobby.