USHAYE NGESITHENDE UHLELO
UNOMALANGA Shozi, osakaza uhlelo olubizwa ngethe Flame At Night kusuka ngomsombuluko kuya kulwesihlanu kwigagasi FM, kubikwa ukuthi ushaye ngesithende ithuba lokuba ngumethuli wohlelo lwantambama oluyinyama kubasakazi abaningi. Le ntokazi kuthiwa yenqabe lolu hlelo ngenxa yokuba matasa nohlelo lukumabonakude.
UMSAKAZI wegagasi FM kubikwa ukuthi uchithe uhlelo oluyinyama endimeni yezokusakaza. Unomalanga Shozi ongumsakazi ophinde abe ngumethuli wohlelo lukamabonakude olubizwa ngeswenka ushayela uhlelo olubizwa ngokuthi The Flame At Night, oludlala kusuka ngomsombuluko kuya kulwesihlanu kwigagasi FM.
Ngokuthola KWELANGA LangeSonto emthonjeni walo othembekile ongaphakathi kulesi siteshi, lo msakazi unikwe ithuba elingandele bani lokwethula uhlelo lwantambama olufuniswa okwembuzi yomsebenzi emkhakheni wezokusakaza.
Kuthiwa unikwe uhlelo olungena ngo-15:00 kuya ku-18:00 ntambama olwaziwa ngele-afternoon Show Off.
Umthombo uthi lo msakazi ukhahlele leli thuba ngenxa yokuthi ufuna ukugxila kulolu hlelo alwethula kumabonakude.
“Isikhathi sasemini usisebenzisela uhlelo lukamabonakude nokwenze kwanzima ukuthi amukele uhlelo lwantama. Ucele ukuba aqhubeke nolwasebusuku,” kusho umthombo.
Unomalanga ubebuye asakaze nohlelo olubizwa nge-all Access Mzansi olusamile okwesikhashana obelukhonjiswa esiteshini esitholakala KWIDSTV Mzansi Magic.
Njengoba kwenziwa ushintsho nje kuthiwa abasakazi abaningi bebebambe umoya, bengazi ukuthi ikusasa labo limi kanjani. Kuyaziwa ukuthi imisakazo eminingi yenza izinguquko ngombasa (April) (Mbasa).
Ukhulekani Shandu okhulumela lesi siteshi uthe bazoba nomhlangano nabezindaba lapho bezoveza khona izinguquko zakulesi siteshi ngesonto elizayo.
“Ngeke ngikwazi ukusho lutho ngoshintsho okwamanje ngoba isimemezelo esisemthethweni asikakasikhiphi,” kusho yena. tzondi@ilanganews.co.za