AMAQEMBU EPOLITIKI AGAQELE INQUTHU
APHOTHULA imikhankaso yawo amaqembu epolitiki yokunxenxa amavoti njengoba kuzoba nokhetho lokuchibiyela kumasipala inquthu ngolwesithathu olubhekwe ngamehlo abomvu.
Namuhla kulindeleke ukuba umengameli we-african National Congress (ANC) umnu Jacob Zuma ethule inkulumo yosuku emcimbini WE-ANC isiyanqoba Rally, eyenzelwe kude buduze neNquthu Plaza. Ukuhambela kukamnu Zuma lo mcimbi kuqinisekiswe YI-ANC esitatimendeni sabezindaba esi- khiphe izolo.
Izolo idemocratic Alliance (DA) nayo ewugaqele lo masipala ibikuyo le ndawo iyoshayela isipikili sokugcina ngemikhankaso.
Umholi weda KwazuluNatal umnu Zwakele Mncwango nomnu Sizwe Mchunu oyilunga lesishayamthetho kulesu sufundazwe bebematasa bekhankasa.
Kuningi-ke osopolitiki abebenxenxa amavoti abakuthembise umphakathi waseNquthu.
Phakathi kwezinye nje zezethembiso ezenziwe ngosopolitiki kubalwa kuzo ukudalwa kwamathuba emisebenzi wukusiza abantu kwezamabhizinisi, nokunye.
Osopolitiki bamaqembu ehlukene okubalwa kuwo inkatha Freedom Party, neEconomic Freedom Fighters (EFF), nenational Freedom Party (NFP) bebephithizela kule ndawo bekhankasa.
Kuzokhumbuleka ukuthi lolu khetho lulandela isinqumo esisuse umsindo sikaNgqongqoshe wezokubusa ngokubambisana nobuholi bomdabu, unkk Nomusa Dube-ncube, sokuwuhlakaza umkhandlu walo masipala, wathi amakhansela ahlulekile wukukhetha amalunga omkhandlu ngenxa yokukwebhana kwepolitiki obekukhona selokhu kwedlule ukhetho lohulumeni basekhaya ngonyaka ophelile. Leso sinqumo sakhe saphasiswa ngungqongqoshe kazwelonke umnu Des van Rooyen.
Kulindele ukuba ezokuphepha ziqiniswe ngolwesithathu njengoba kuke kwabikwa nezigameko zodlame phambilini.