Masizinikele ekwenzeni umehluko
IZIMANGALISO zempilo ziyohlale njalo zisithusa, zisimangalisa futhi zisenze sizibuze umbuzo othi konakelephi?
Ukube kuyenzeka nje abantu kebahlangane bafake iso elijulile nelibanzi kokuningi okwenzeka kulesi sikhathi esikusona, ngabe nami nawe siyamemezela ukuthi vuka sizwe, vula amehlo, zihluphe ngokucabanga, bamba iqhaza ekwenzeni ngcono lesi simo, zinikele uzimisele ukwenza umehluko kulesi sizwe.
Mina ngingomunye wabantu abathandayo ukuzwa izinkulumompikiswano ezinohlonze futhi zenziwa ngabantu abayaziyo indaba yabo, bebe bezihluphile ngokufuna ulwazi olungaphezulu kolwejwayelekile futhi bakugcine ezingqondweni zabo ukuthi nathi njengezakhamuzi, sihlakaniphile, siyacabanga, sinolwazi futhi sikwazi kahle ukubona uma sekudlalwa nje ngesikhathi, nangathi uqobo.
Ingqinamba enkulu esibhekene nayo ngeyokuthi uma uke waqala ukuphakamisa izwi elithile, sekuyaye kube wukuthi usuyopendwa-ke ngopende wepolitiki noma wohlangothi oluthile njengoba ipolitiki isihamba ngokuthi wena uhamba naluphi uhlangothi lwepolitiki.
Lokhu kwenza ukuba abantu babe ngamavila okucabanga, nokuba nengxoxo ekhululekile, evulekile, nezoletha ulwazi olusha kubantu.
Ake siye nje ephalamende, lapho izinto ezimangalisayo zenzeka khona kulesi sikhathi.
Umuntu nje olambele ulwazi futhi othandayo ukubona izingxoxo nezinkulumo-mpikiswano eziqhwiza umentshisi, awusoze wambona emisa yonke into ayenzayo, athi ufuna ukubona amalunga ephalamende ejijimeza umengameli wezwe ngemibuzo ebukhali.
Umengameli wezwe uya ephalamende eyophendula imibuzo emalungwini ahloniphekile, asuke emele abantu abaningi abasuke bewavotele kodwa uvele ubone kubangwa umsindo, kubizwana ngamagama kuze kuthukwane nangezinhlamba, kulahleke ukulawula leya ndlu yephalamende, uze ubone izingwevu lezi esezinesikhathi zilaphaya, zibheka phansi, zinamahloni okuthi sadlala kangaka ngenkululeko esayithola kanzima.
Mina ngafunda izincwadi, phakathi kwezinye, lezi ezintathu engizozibala, nokuyizona ezangibonisa ukuthi ukubanga umsindo nokuhhahhameza umuntu, noma ngabe kukusiphi isigaba, kuluphawu lokungabi nabo ubungcweti bokuxoxa izinto, zifakelwe kahle iso bese ziyokwethulwa njengezihloko zenkulumo eshisa phansi, lapho zonke izinhlangothi zoba nethuba lokubonakalisa ukwazi nobukhali bekhono lokucabanga, nokugadulisana ngamazwi ajulile, agcwele ubuhlakani, nobuholi obujulile.
Lezi zincwadi: Art of War ebhalwe ngusun Tsu, The Burden of Freedom ebhalwe ngumyles Munroe ne-48 Laws of Power ebhalwe ngurobert Greene, zikuvula amehlo, ubone umhlaba ngokungejwayelekile.
Uma ufunde lezi zincwadi engizibale ngenhla, uyobona uku- thi akusoze kwenzeka ukuthi ubuqhawe kule nkululeko esayitholayo, buyobonakala ngokuthi ngubani onomsindo kangakanani, nokuthi ngubani okwazi ukudedela amazwi anenhlamba komunye kodwa ubuqhawe nobuholi obuqotho nobunobungcweti, yilobo bokukuphonsela inselelo enkundleni yolwazi nobunjulalwazi, nobuncithabuchopho.
Wena ukubiza ngokuthi kuyini nje ukuchitha amahora ngamahora singasho lutho olwakha isizwe noluletha inqubekela phambili ekuphileni nasekusebenzeni kwethu kwemihla ngemihla?
Ake sivule amehlo, sicubungule lesi sikhathi esikuso ukuze sikwazi ukuhlahla inyathuko ecacile ebheke phambili.