Kumele ohluliwe ayivume induku
SILINDE LE ukuthula u m ase kumenyezelwa imiphumela yokhetho l wango lwesithathu loMkhandlu wase n quthu, enyakatho yekwazulu-natal. Sesidlulile isikhathi sokuklwebhana kubangwa abalandeli.
Siyazi ukuthi onke amaqembu aphume ngobuningi bawo eyokhankasela ukuwina lo masipala osematheni kulezi nsuku.
Akekho owake wacabanga ukuthi inquthu izoke ibaluleke kangaka kwezepolitiki. Sibonile ukuthi ezinyangeni ezimbalwa ezedlule le ndawo iphenduke inkundla yezombusazwe.
Amaqembu mawalindele ukuthi zingase zishube futhi izinto uma sekumenyezelwa imiphumela yokhetho njengoba kungenzeka ukuba kuphinde umasumpa abawinayo bawine ngengcuphe bese bephoqeleka ukuba beshele amanye amaqembu ukuba abagcwalisele amavoti.
Kungaba wumqondo omubi ukuba kume intuthuko kuleya ndawo ngenxa yokudonsisana kwamaqembu engafuni ukwemukela ukwehlulwa.
Uma kusempini nakanjani kumele kube khona owehlulwayo, kugezwane izingozi, kukhunyelwane umlotha, kuqhutshekwe nempilo.
Akubalulekile kithi ukuthi yiliphi iqembu elizodla umhlanganiso kepha kufanele kube yiqembu elizoletha umehluko ezimpilweni zabantu, intuthuko ibonakale emphakathini.
Amaqembu abhekwe ngabomvu kulo masipala alala engalele yi-african National Congress (ANC), yi-economic Freedom Fighters (EFF), Inkatha Freedom Party (IFP) yidemocratic Alliance (DA) namanye.
Onke lawa amaqembu ahlabelela ingoma eyodwa yokuthi azoletha intuthuko kubantu, abanakekele. Onke ayagxekana, akhombana ngeminwe ayanyundelana, sekukubo abavoti ukuba bazikhethele iqembu abafisa ukuba libahole, abalethembayo ukuthi lizobeka izidingo zabo phambili.
Njengoba-ke bekufika ngisho izikhulu eziphezulu kuleya ndawo, zamaqembu ehlukene epolitiki eyonxenxa amavoti, kungakuhle ukuba kungathi uma sezikutholile ebezikufuna, umphakathi usuvotile bese zifulathela, zingabheki emuva.
Phela kuvamisile ukuba kube kuhle ngesikhathi kusanxenxwa amavoti, ngemuva kwalokho kuthi nya, kwande imibhikisho abantu sebekhala ngezidingongqangi zabo.
Sengathi osopolitiki bangakwenza kube wumkhuba ukuvakashela imiphakathi ngisho kungonakele lutho nje, ngenhloso yokuyobheka ukuthi izinto zihamba kahle yini emphakathini, kubhekwe nokuthi labo abaqokiwe ukuba basebenzele umphakathi bayawenza yini umsebenzi wabo.
Uma kubonakala ukuthi kabawenzi kahle, bathathelwe izinyathelo ezifanele noma bakhishwe, kungaze kuhlukumezeke umphakathi.
Siyagcizelela futhi ukuthi uma sekukhishwa imiphumela yangolwesithathu silindele ukuba kuheleze umoya wozwano, abehluliwe babongele abawinile, abawinile bangabaklolodeli abehluliwe.
Sengathi osopolitiki bangakwenza kube wumkhuba ukuvakashela imiphakathi ngisho kungonakele lutho.