Sicela izikhungo zemfundo ephakeme ophongolo
MHLELI, ngithi ake ngisike elijikayo nami kulezo ezingishisa ngaphakathi. Ngiyisakhamuzi esakhele indawo yasophongolo nokuyindawo uma uthi uyayibheka uvele ubone ukuthi isasilele emuva kwenzinye izinto.
Le ndawo ngenye yezindawo ezidume kakhulu ngezehlakalo zokugencana ikakhulukazi okwenziwa ngabantu abasha bese kuba amaqembu emigulukudu afahlaza kwasani, konke lokhu kwenziwa ngabantu abasha abangasebenzi nabaqede isikole bahluleka ukuyofundela imisebenzi.
Enye into eyimbangela kulokhu wukuthi indawo yethu inezakhiwo eziningi zophuzo oludakayo uma uqhathanisa nezindawo la abantu abasha bengacijela khona amakhono ze babe semathubeni okuthola imisebenzi. Uthola ukuthi umuntu uqeda esikoleni bese angasazi uzoshonaphi ngoba indawo yethu ikude kunezikhungo zokuqeqesha (Universities namatvet College). Umzali osokolayo akakwazi nhlobo ukulekelela ingane uma sekumele iye kodurban, Tshwane nakwezinye izindawo ezinalezi zikhungo.
Umzali ushaywa yimali yokuba kugibele ingane, yimali yokuqasha, yimali yokudla, yimali yesikole nokunye, ngakho-ke siyanxusa kuhulumeni ukuba asilekele sike sakhelwe ITVET College ophongolo.
Siyakhuleka nasebuholini esibuhlonipha kakhulu obuhola umkhandlu wethu wasoPhongolo ukuba ulufakele izibuko lolu daba ngoba ukuba khona kwayo eduze kwethu cishe kungawenza umehluko, kunciphe ukubonakala kwabantu abasha bengena ezintweni ezingasile ngoba ingekho into esile abangayenza.
Uphongolo ngenye yenzindawo ezenze kahle kumatikuletsheni kodwa uma ungabheka ukuthi zonke lezi ngane ezisuke ziphasile zigcina zishonephi, uzothola ukuthi zingene shi ezidakamizweni.
Thatha ingane eqede ngowezi-2008 bese ubheka ukuthi ikuphi nempilo, uzothola ukuthi ithe shi kwizidakamizwa hhayi ngoba ithanda kodwa ngenxa yokuswela amandla kumzali okuyifundisa, bese kuba wukushoda kolwazi enganeni ngosizo lwezimali lukahulumeni (NSFAS). Isizwe yisizwe ngemfundo futhi akekho umzali ongathandi ukuba ingane yakhe ifunde ithole izinqu maqede ibe nempilo engcono ze kushitshe nesimo sasekhaya. Konke lokhu kubanzima kumzali odonsa kanzima.