Wasinda ezilingweni zasemculweni
KWACISHE kwamqumba phansi ukuduma esemncane usiboniso Dlamini odume ngelikamsawawa emculweni nomatasa kulezi zinsuku ngokuvakashela izikole ezahlukahlukene maphakathi nekwazulu-natal enikela ngemifaniswano yasebusika.
Nakuba kubukeka usushone phansi umculo wakhe kodwa umsawawa uthi akayi ndawo njengoba esanda kudedela ingoma nomroza Fakude wodumo lukavan Damme. Uthi akupheleli lapho njengoba ezokhipha enye futhi maduzane eyisigubhu ukuze kudanse abantu ethi “Umdanso Omusha.”
Uqhuba athi nakuba asinda ezintweni eziningi okuyizidakamizwa, wutshwala nobufebe okuyizinto ezimataniswa nomculo kodwa kumshayile okunye kancane ngoba ubeseyingane.
“Khona amantombazane abeziphonsa vele kodwa umuntu uphunyulile. Nendaba yokungalali ekubeni kumele uvuke uye esikoleni ibiyinkinga. Abantu abadala okuthiwa ngijole nabo mhlawumbe yingoba yibona ebengilingana nabo ngokomqondo nokuthi bese ngizisebenzela,” kusho yena engxoxweni ekhethekile NELANGA Langesonto ngo- hambo lwakhe kulo mkhakha womculo nangezinhlelo zakhe zakamuva.
Sekuwumlando ukuba sematheni kwakhe ngokuthandana nontokozo Masinga ngokunjalo nokubhuntsha komshado wakhe no-angela Gwala abebemshiya ngeminyaka eminingi.
Kulezi zinsuku umatasa ngaphansi kohlelo lwakhe lokuthuthukisa intsha olubizwa ngemsawawa Youth Charity Campaign alwenza ngokubambisana nabanye osomabhizinisi.
Kamuva nje ubevakashele izikole iphesheya Primary, ikhombindlela High, idover Farm, zonke ezisempangeni benikela ngemifaniswano njengoba sekuqala ubusika.
Abalandeli bakhe emculweni bamgcine ngowezi-2014 ngengoma ethi Dlala Baby nethi Sodl’imali esasayinwe yitouch Africa Records kamdu Ngcobo obehlonishwa ngumasipala itheku emasontweni ambalwa edlule ngegalelo lakhe emculweni.
Manje usesayine nemaz Entertainment kadkt Musa Zulu wamakhambi okwelapha emaz Herbal.
“Uma ungumculi nje, uyayidinga inkampani ezofana nesambulela, uyamdinga umuntu ozokumeneja, akuqophe futhi akusabalalisele umsebenzi wakho.
"Kakulula nhlobo ukufinyelelisa umculo ezweni lonke uma uzimele,” usho kanjena eqinisekisa ukuthi nakuba ebhizi nalo mkhankaso nezikole kodwa usuvuke qingqo umculo wakhe.
Uthi ngolwesihlanu oluzayo zimbili babize izikole ezahlukene ebongz Take-away empangeni ukuyozazisa ngalolu hlelo lwabo, nokumele zikwenze uma kukhona abadinga usizo.
Ngale kwalokhu lisekhona nebhizinisi lakhe imsawawa’s Corner eclaremont, ethekwini.
Le ndawo ngeyokuzithokozisa kudliwe kushaywe neziphuzo, ibuye iqashiswe ukwenza imicimbi.