KULINDELEKE AMACIKO AMANINGI KOKASIXOLO
KULINDELEKE abalingisi, abaculi namanye amaciko adumile namuhla emngcwabeni wengwazi kwezikaqedisizungu, umzwandile Washington Sixolo, oshone ngempelasonto edlule.
Inkonzo yomngcwabo izoqala ngele-11 ekuseni eseventh Day Adventist Church, e-orlando West, egoli.
Ukwedlula kwaleli ciko emhlabeni kusho ukuvalwa kwesinye isahluko emlandweni wezingqalabutho kwezikaqedisizungu emphakathini wabomdabu kuleli.
Umnu Sixolo ubengomunye wabantu abayisibonelo sekhono lendabuko elikubantu abamnyama ikakhulukazi abesizukulwane sakhe, lokuba bakwazi ukwenza ngempumelelo izinto abangazifundelanga emanyuvesi kepha ngekhono lokuzalwa bagcine sebengosaziwayo kuleyo mikhakha.
U"bra Wash”, njengoba ebeteketiswa kanjalo ngabasondelene naye, ILANGA libikile ngomlando ofinyeziwe wempilo yakhe eliwucobelele endodaneni yakhe, umnu Zolani Sixolo, njengoba ngesikhathi liwucela ubesevele engasemnandi empilweni nokwase kuqhubeka eminyakeni emithathu eyedlule.
Le nsizwa yaduma kakhulu ngomculo ocwengekile weqembu iking’s Messengers Quartet owenza yona namalungu aleli qembu bayizilomo, bemenywa ngapha nangapha futhi bahambela cishe wonke amazwe angomakhelwane waleli manje asaziwa ngelesadc.
Elesotho baculela inkosi umoshoeshoe II kwathi ezambia baculela umengameli Kenneth Kaunda. Kuleli qembu ubezibambe nobilly Mahlalela, Justice Masinga no-alex Maseko.
Kubalandeli baleli qembu ubethandeka ngephimbo lakhe le- bass enothile necwengekile abanye baze balifanise ne- organ.
Okuvelile ngale nsizwa kwesinye isiteshi sikamabonakude wukuthi ibinamakhono amaningi. Phakathi kwezinto azenzile ngempumelelo wumculo aqale ukwaziwa ngawo.
Ngokuvulwa kwesiteshi sikamabonakude, I-TV2, ngowe-1981 wadlala emdlalweni owabhalwa ngumnu Mduduzi Hlophe othi “Usenzekile” alingisa kuwo indawo kajackson nowavotelwa ngawo ukuba ngumdlali ovelele ngalowo nyaka.
Udlale nakweminye imidlalo yamahlaya njengalowo osihloko sithi "Going Up", "Emzini Wezinsizwa" naku"shaka Zulu" futhi uke walingisa nabalingisi abasezingeni eliphezulu okubalwa kubo ujackie Chan noken Gampu.
Ubengusomahlaya kusukela esaculela iking’s Messengers Quartet lapho ebekwazi ukuhlekisa abantu abebehambela amakhonsathi abo. Iqembu labo libe ngelokuqala kwawomdabu omculo wokholo ukuba liqophe umculo walo uthengiswe ezitolo.