Unovalo lokungcwatshwa YIPSL ephila
Sesiphila ngokuminca isikhulu sethanda
USEPHILA ngokuminca upierre Delvaux ongumnikazi wethanda Royal Zulu ukuba ipremier Soccer League (PSL) ivumele ukuba adayisele Amazulu FC ilungelo lekilabhu yakhe lokudlala kwi-absa Premiership.
“Ngikhathazekile ngoba isikhathi siyasishiya. Ngihlalele ethembeni ukuthi yonke le nto isongwe kuleli sonto esiliqalayo bese kuphela ngayo. Konke kulele esigungwini esiphezulu SEPSL okuyisona okufanele sinqume. Singadayiselana thina ngo-r100 million kodwa uma kunqabe sona kayikho into engenzeka. Nokho ngifuna ukukubeka kucace ukuthi amandla okuqhubeka nokuhola ikilabhu kangisenawo,” kusho udelvaux.
Le nkulumo kadelvaux isidweba ngokusobala isithombe sokuthi usenele ngunobhutshuzwayo waseNingizimu Afrika njengoba edalule ukuthi usephundleke kakhulu yiwona.
Udelvaux ushaqise abaningi ememezela ukuthi uzoyifaka endalini ithanda iqeda nje ukujabulisa abalandeli bayo nabantu bakwazulu-natal ngokungena kwiAbsa Premiership emuva kokuba iwaqwaqwade amakhanda wonke amakilabhu ebigijima nawo kwinational First Division (NFD). Ngaleso sikhathi uthe le kilabhu uzoyithengisa uma kuwukuthi akabatholi abaxhasi.
Nokho injabulo iphenduke yaba muncu kusabalala imibiko ethi Amazulu FC aholwa ngudkt Patrick Sokhela athenga ilungelo lethanda lokudlala kwipremiership. Lezi zindaba kazehlanga kahle komasipala ababili, umhlathuze neking Cetshwayo abebeseka le kilabhu ngemali. Umhlathuze uze wabhala incwadi ufuna kumiswe ukudayiswa kwale kilabhu.
Leli phephandaba lishayelwe ngudelvaux ngolwesihlanu ekuseni, wacela ukukhuluma iqiniso ngethanda kubalwa namabhonasi.
“Ngicela ukusho ukuthi ibuhlungu inhliziyo yami uma kubhalwa izinto ngami, ngishiswa ngiphila, kodwa kungabi bikho ngisho umuntu oyedwa oza kimina ukuzongivikela kumbe angibuze iqiniso,” kusho udelvaux phambilini othintiwe kodwa akaze alubamba ucingo futhi akaze azihlupha ngokubuyela kuleli phephandaba neqiniso ngesikhathi lenza umbiko walo wokuqala walolu daba onya-kazise abaningi emasontweni amabili adlule.
Uthi kumanje uyabisha ezinkingeni zokweswela imali njengoba eveze nokuthi uhluleke ngisho ukubonga abadlali bakhe ngokubabonelela ngamabhonasi ngokufaka le kilabhu kwipremiership.
Udelvaux obezwakala ukuthi uphatheke kabi, uthe: “Ngesikhathi ithanda inyuselwa kwipremiership akukho noyedwa umuntu oze kimina wathi nanti ibhonasi labadlali njengoba benyuse ikilabhu, ngikhuluma nje akukho mali. Njengoba siphumelele ukungena kwipremiership sinikwe u-r300 000 yiligi. Yonke leyo mali kufanele iye kuroger Sikhakhane obengumqeqeshi nenye ngaphezulu, okusho ukuthi kuleyo mali abadlali kabatholi lutho.
“Abadlali besibanika imihlomulo yokunqoba imidlalo, akukho noyedwa ongakaze awuthole, kangibakweleti lutho.
Kodwa-ke njengosihlalo wekilabhu ngisezinhlelweni zokudayisa abadlali abayisihlanu okuzo- kuthi imali engizoyithola lapho bese ngibabonelela ngamabhonasi okufaka ikilabhu kwipremiership.
“Ngifuna ukukubeka kucace ukuthi kayikho inkontileka ephambi kwami ethi kufanele nginike abadlali imali ngokufaka le kilabhu kwipremiership. Konke kuzokube kusuka emseni wami. Nakhona ngithintwa ngamazwi kamhlengi Cele ongumgadli wethu okuthe siqeda ukushaya ireal Kings United emdlalweni wokugcina wathi uyazi ukuthi ikilabhu kayinamali kodwa uyazicelela ukuthi ngithathe u-r1 million ngiwunike abadlali bahlukaniselane.
“Ngizama lokho futhi kungenzeka ngibanike okungaphezulu kwalokho okushiwo ngumhlengi. Njengamanje kanginamali, kwamiholo yabadlali yenyanga edlule ibingekho, ngazama. Nakulokhu njengoba kuzophela inyanga nje imali yokubaholela kayibonwa kodwa kufanele ngizame kuholwe.”
Limcela leli phephandaba ukuba acacise ukuthi zimi kuphi manje izingxoxo zokudayiselana kwakhe nosuthu uthe: “Njengamanje akukho engingakusho ngokudayiselana kwethu namazulu.
"Engingakuqinisekisa wukuthi bayafuna ukuthenga ikilabhu futhi kakusibona bona bodwa bakhona nabanye. Ngifuna ukukubeka kucace ukuthi kangivukanga (ngakusasa) ngathi le kilabhu ngiyayidayisa. Kudala ngakucabanga ngenxa yokudonsa kanzima kwezemali.
“Ngifuna ukuxolisa kakhulu kubalandeli bekilabhu. Ngifuna bazi ukuthi isimo engibhekene naso singaphezulu kwamandla ami. Ngeke ngikwazi ukuqhubeka nokuphatha ikilabhu, amandla yiwona angasekho. Ngeke ngivumele ukuthi ithanda idliwe (icwile ngenxa yezikweletu) kungcono kube khona engikwenzayo. Ngiyaxolisa kakhulu kubona ngiyazi ukuthi badiniwe kodwa kumele bazi ukuthi kubuhlungu ukukhokha imiholo kanzima nokukhokhela i-virgin active obekujima kuyona abadlali.
“Ngibonga nojomo Biyela obeyisikhulu esiphezulu sekilabhu ngomsebenzi omuhle awenzile. Ngibonga nomasipala umhlathuze obusinika ur2,5 million neking Cetshwayo esinike ur1,5 million ngesizini. Le mali isisize kakhulu, ngibonga kakhulu.
“Ngicela ukutshela nabadlali ukuthi bangabheki phansi. Kumele bakhululeke bangabadlali abaseqophelweni eliphezulu bazowathola amakilabhu. Ngifuna ukubathembisa ukuthi le nyanga izophela sekucacile ukuthi kwenzakalani ngekilabhu nangabo uqobo,” kuphetha udelvaux.