ISIKHULU SILAXAZE INDABA KA-PIENAAR KUSHIYA UMQEQESHI
ISIKHULU sekilabhu egijima kwiAbsa Premiership siphumela obala ngosteven “Schillo” Pienaar ( osesithombeni) osasemabhukwini esunderland yase-england egencwe yizembe kwibarclays Premiership.
Upienaar usayiniswe ngudavid Moyes wesunderland inkontileka yonyaka ngesizini esanda kusongwa.
Inkontileka yalo mdlali izophela uma kusongwa unhlangulana (June).
Nokho lo mdlali akazange abe nesizini enhle njengoba egijime imidlalo emibalwa wangabe esabonakala.
Abezindaba base-england baze bamubiza ngomunye wabadlali ababhacazile ngesizini eyedlule.
Lo mdlali umataniswa noku- shaya ibuya eningizimu Afrika njengoba kuvela ukuthi kunamakilabhu amfunayo. Kubikwa ukuthi ufunwa yi-orlando Pirates necape Town City.
Leli phephandaba libe nengxoxo nojohn Comitis ongumnikazi wecity. Uphumele obala ngodaba lukapienaar.
“Engifuna ukukuqinisekisa wukuthi upienaar bengimfuna kodwa-ke ukuhamba kuka-eric Tinkler ojoyine isupersport United kuphazamise izinto eziningi. Upienaar ukhona ngapha (ecape Town) kodwa ngeke ngisakwazi ukuhlangana naye okwamanje ngenxa yokuthi umfutho wami wonke ngiwufake ekufuneni umqeqeshi omusha.
“Ngimise yonke into emayelana nokusayinisa abadlali okwamanje kuze kube ngithola umqeqeshi. Njengoba ngikhuluma nawe nje cishe zingaphezulu kwama-25 izicelo zomsebenzi (cv) eziphambi kwami, abaqeqeshi abafuna umsebenzi.
"Okungijabulisayo wukuthi ngibona nabaqeqeshi abahlonishwayo baphesheya, nabakuleli bakhona.
“Kodwa-ke ngizozinika isikhathi ngiwacubungule kahle.
"Engingeke ngikuvumele kwenzeke wukuthi abezindaba basetshenziswe ngama- agent babhale ukuthi sifuna bani ukuze siqoke umuntu wawo. Ngizozinqumela umuntu engibona ukuthi umfanele lo msebenzi,” kusho ucomitis.
Uthi nakuba engenaso isikhathi azibekele sona ukuba esephothulile ngodaba lomqeqeshi kodwa kuyisifiso sakhe ukuthi kuphele isonto sekucaca ukuthi ubhekephi.
Kubaqeqeshi abamataniswa nomsebenzi wecity kungabalwa uruud Krol, ukostadin Papic, uroger Sikhakhane, ubenni Mccarthy, ucavin Johnson u-owen da Gama ukukha nje phezulu.