USAYINA KWI-BLOEMFONTEIN CELTIC OXOSHWE WUSUTHU
UTHOLE ikhaya ekilabhini egijima kwi-absa Premiership umdlali okhonjwe indlela ngamazulu FC asemizamweni yokuthenga ilungelo lethanda Royal Zulu lokudlala kwi-absa Premiership.
Usuthu lumemezele ukuthi ngeke luyelule inkontileka karoggert Nyundu obengumgadli wale kilabhu. Unyundu ufike osuthwi- ni ngasekupheleni konyaka odlule emuva kokuxoshwa yiblack Leopards.
Ufike osuthwini akaze akwenza obekulindeleke kuyena njengoba edlale imidlalo emibalwa washaya amagoli amabili.
Nokho leli phephandaba lithole ukuthi unyundu usesayine inkontileka yesibambiso neBloemfontein Celtic.
Kuthiwa usayina nale kilabhu nje, ubefunwa nayi-orlando Pirates.
Leli phephandaba lishayela ukhumbulani Konco oyisikhulu esiphezulu seceltic ngalolu daba, uthe: “Okwamanje akukho engingakuphawula ngodaba oluthinta abadlali ngoba ikilabhu isavalile. Sizomemezela kahle zonke izinto uma sesivulile.”
Baningi abadlali bosuthu okulindeleke ukuthi badliwe yizembe uma kugcina ngokuthi ipremier Soccer League (PSL) ikuvume ukuthengiselana phakathi kwezikhulu zale kilabhu nezethanda Royal Zulu esezifuna ukuphuma ziphele kunobhutshuzwayo waseNingizimu Afrika.
Upierre Delvaux ongumnikazi wethanda ukhala ngokuthi akasenayo imali yokuqhubeka nokuphatha le kilabhu esanda kunyukela esigabeni esikhulu.
Uthi yingalesi sizathu ethathe isinqumo sokuyifaka endalini ukugwema ukufaka IPSL ehlazweni lokuhluleka ukuholela abadlali.
Isitifiketi sosuthu sokudlala kwinational First Division (NFD) kubhekeke ukuba sisale nosifiso “Jomo” Biyela obeyisikhulu esiphezulu sethanda. Nokho kulindeleke ukuba ayiqambe ngerichards Bay FC.