I-BAROKA FC IBUYELE KWI-ABSA PREMIERSHIP
IBUYELE kwi-absa Premiership ibaroka FC yaselimpopo ibambana neblack Leopards ngo-1-1 kowokugcina wokuhlungela ukungena kwipremiership izolo ngomgqibelo ntambama ethohoyandou.
Ileopards ezoqhubeka nokugijima kwinational First Division (NFD), iye kulo mdlalo inengcindezi yokunqoba ngamagoli amabili kuya phezulu.
Izinto zivele zamuncu kule kilabhu njengoba ibaroka ithole igoli elimqoka elivalelwe nguvictor Letsoalo ngomzuzu wama-34. Eleleopards lishaywe ngusiphelele Ntshangase kuyiphenathi ngomzuzu wama-65. Uletsoalo uthole ikhadi elibomvu kusanda kuqala isiwombe sesibili.
Ukuphuma kwalo mdlali, kubonakale kuzoyinika ithuba elanele ileopards lokuhlohla amagoli.
Nokho ihluleke yancama njengoba belungabhodlozeki udonga lwebaroka FC.
Ujean Luscuito ocija ileopards uzwakalise okukhulu ukuphoxeka ngokuhluleka ukunyusela le kilabhu kwipremiership.
“Sikwenze konke obekumele sikwenze kodwa kwangalunga. Ngibuhlungu ngoba bengithembise abalandeli bethu nosihlalo wekilabhu ukuthi ngizoyifaka kwipremiership. Nokho-ke angikhali kakhulu njengoba siqede endaweni yesibili kwi-log YENFD.
"Ngiyayibongela ibaroka ngokugcina indawo yayo esigabeni esikhulu,” kusho lo mqeqeshi.
Ukgoloko Thobejane ololonga ibaroka ujabulise okwengane encane iphiwa uswidi ngokuqhuba ngempumelelo le kilabhu.
“Ukuphuma kukaletsoalo akubanga nomthelela omubi kithina. Ngize ngashaya ihlombe ngesikhathi ekhishwa ngenhloso yokukhuthaza abadlali bami. Khona sibe nesizimi embi kwipremiership,” kusho lo mqeqeshi.