MUSANI UKUZIPHUSHA KAKHULU UMA NIQOPHA, BACULI
SIXWAYISA abaculi ukuba baqikelele ukuba uma beyoqopha i-albhamu enezingoma eziningi bazinika ithuba, bangaziqophi zonke kanyekanye ngoba kwesinye isikhathi amaphimbo ayakhathala bagcine sebehoshoza.
Siyazi ukuthi iningi labaculi lithatha isinqumo sokuyoqopha i-albhamu lingenayo imali eyanele bese liphoqeleka ukuba lixhobele konke ebhodweni ngosuku olulodwa.
Sekukaningi sihlangabezana nenkinga yabaculi abanamaphimbo ahoshozayo uma sekufika ezingomeni ezingasekupheleni kwe-albhamu, kucace ukuthi bese bedonsa ngodizili.
Kuyawunyemfisa lokho umsebenzi omuhle osuke uzwakale ezingomeni ezingasekuqaleni kwealbhamu. Kuyaziwa ukuthi iwayini elimnandi likhishwa ekugcineni, uma ingoma yokugcina izobheda kuvele kube sengathi yonke i-albhamu iyabheda.
Ziningi izizathu ezidala ukuba abaculi baqophe baxhobele baze bashe amazwi. Singabala lezi ezilandelayo:
* Ukuntula imali yokuqasha isitudiyo
* Ukuzilolonga iphimbo ngokweqile
* Ukulala ukhamise umlomo kungene amakhaza
* Ukucula ngomphimbo * Nokucula ucasukile
Uma uzoqopha i-albhamu, hlela kahle nonjiniyela noma nomnikazi wesitudiyo nibonisane ngohlobo lomculo wakho, isibalo sabaculi, nohlobo lwesitudiyo.
Ayikho inkinga uma umculi oqoshwayo engenayo imali eyanele yokukhokhela isitudiyo. Angaxoxa nomnikazi waso baqophe izikhawu ukuze kuphume ukhilimu wento.
Ukuqopha kudinga ukuba umculi noma abaculi babeke umoya phansi, babekezelele zonke izinkinga zasesitudiyo.
Kuyenzeka amakhompyutha agoloze, kudingeke ukuba kumiwe kulungiswe leyo nkinga. Kwesinye isikhathi kuthi sekuphelile ukuqopha kutholakale ukuthi yonke into ebiqoshiwe inyamalele, bacasuke abaculi, kuthi uma sebephinda bangabe besaba nomfutho abebenawo besaqala.
Ezimeni lapho iphutha lenziwe ngunjiniyela kuba wumqansa ngoba akabe esafuna ukuba kubuywe ngelinye ilanga kuqedelwe umsebenzi, esekhalela ukuthi kukhona ababekele lolo suku. Zonke lezo zimo kumele bazazi abaculi.
Okunye okumele bakwazi abaculi yisimo lapho unjiniyela eyindlamanzi, ethi esebenza alibale ukunkintsha utshwala noma abe lokhu ephumela emnyango ebhema sengathi uyethwasa.
Yizo zonke lezi zinto esizibalile ezingadicilela phansi umsebenzi omuhle womculi uma engabhekile futhi edlala ukungazi. Baqaphele futhi abaculi amanga onjiniyela nabanikazi bezitudiyo abawaqamba uma bevalekile befuna imali. Iningi labo lenza izethembiso ezingekho, uma sebebanjiwe bahlahle amehlo babe nolaka ekubeni kuyibo abasemaphutheni.