Zijulile ezidingidwa engqungqutheleni YE-ANC
EZEPOLITIKI: Ukhulume nangokushaqwa kombuso
INGENA osukwini lwesithathu namuhla ingqungquthela ye-african National Congress (ANC), yenqubomgomo yombutho eseNasrec, Expo Centre, egoli.
Le ngqungquthela izodonsa kuze kube wulwesithathu. Umengameli WE-ANC, umnu Jacob Zuma, eyivula ushumayele izwi lobumbano ngaphakathi embuthweni, wathi ubumbano lubalulekile. “Izingxoxo zethu kumele kube ngezobumbano nokuyisona sisekelo esakhe I-ANC. Lokhu sikufundiswe ngabasunguli beqembu. Upixley Ka Isaka Seme wenza isicelo sokuthi kube nobumbano,” kusho umengameli.
Uthi isifiso sikahulumeni sokuba kube nentuthuko yezomnotho ezonyuka ngo-1,1% kulo nyaka kunokwenzeka kungafinyeleleki kuso. Ngenyanga eyedlule kuphume izibalo zestats SA ezikhomba ukuthi umnotho ushone phansi, nokungabi bikho kozinzo kwezepolitiki kwenze amabhizinisi nabathengi bazithola bephelelwa yithemba.
Umnu Zuma uphinde waphawula ebhekise kumalunga E-ANC asabalalisa umyalezo ongemuhle ngeqembu. Uthe kumele kubhekwe abangakwazi ukuziphatha ngendlela okuyiyo, abahlasela umbutho esidlangalaleli esikhundleni sokuba izindaba zawo zibhekwe ngaphakathi bese kutholwa nezisombululo.
Uphinde wakhuluma ngendaba eshisayo eningizimu Afrika emayelana nezinsolo zokushaqwa kombuso. “Siyakweseka ukusungulwa kwekhomishana yophenyo ebhekelela lolu daba.
"Ngokwepolitiki le nkulumo mpikiswano idinga ukucutshungulwa ngeso lomnotho waseningizimu Afrika ukuze sikwazi ukuqonda ukuthi kusuke kuchazwani uma kukhulunywa ngokubhozonyelwa kombuso,” kusho yena.
Uzuma unxuse abebethamele ingqungquthela ukuba bagxile ekutholeni isisombululo senkinga yezomnotho, baqinisekise ukuthi baba yimbumba, wathi ubumbano yilo olugcina inhlangano nezwe kubumbene.
Izolo ngomgqibelo umnu Jeff Hadebe, oyihead of Policy, wethule umbiko ngohlelo lukazwelonke lwentuthuko (National Development Plan).
Kulo mbiko uveze ukuthi impilo yezingane zakuleli ithuthukile, ukufa kwezingane ezingaphansi kweminyaka emihlanu kwehlile. Nesibalo sezingane ezizalwayo sehlilo okusho ukuphumelela kwezinhlelo zikahulumeni. Nakhu okunye akuvezile:
Isibalo sokuphumelela kukamatikuletsheni senyuke sisukela ku-58% ngowe-1994 saya ku-72% ngowezi-2016.
Nokusho ukuthi sisendleleni okuyiyo ngokwe-south and Eastern Africa Consortium for Monitoring of Educational Quality (SACMEQ) ne-trends in International Mathematics and Science (TIMSS).
Zingaphezu kwama-226 000 izitshudeni zakuma-tvet ezithole uxhaso LWENSFAS ngowezi-2016 nezingaphezu kuka-255 000 zasemanyuvesi.
Ibhajethi yesikhwama saKWANSFAS senyukile eminyakeni sakwazi ukukhokhela iningi lezitshudeni. Yize kunjalo imibhikisho yezitshudeni yabafundi ikutshengise ngokusobala ukuthi isikhwama kasenele, nokuholele ekutheni kungabikhona uzinzo kulo mkhakha.
Uhulumeni uzimisele ukuthi uphinde uvule amanye amakolishi okufundela ayekade esevaliwe.
Bangu 13,2 million kwabangu 16,7 million (79%) abantu asebehlala ezindlini ezisesimweni esigculisayo.
Yize kunjalo ukuphucuka nokufuduka kwabantu kusenomthelela ekwandeni kwabantu abahlala emikhukhwini.
Yize zikhona izinhlelo zokuthuthukiswa kwabahlwempu kodwa ububha sebuqhutshwa wukungatholi imfundo esezingeni elifanele nokusweleka kwamathuba omsebenzi.
Isibalo sabesifazane abasezikhundleni ezibafanele emsebenzini siyanda.