ISINABALANDELI INGANE YOSAZIWAYO
LUPHENDUKE isilomo lungakaqedi ngisho isonto usana losaziwayo, untando Duma nojunior De Rocka ( abasesithombeni), oluzalwe maphakathi naleli sonto.
Ukuphenduka isilomo kwalolu sana kulandela ukuba unina (untando) eluvulele ikhasi lalo enkundleni yokuxhumana, i-instagram. Izolo ngomgqibelo lolu sana oluqanjwe ngosbahle Lisakhanya Mzizi, bese lunabalandeli abangaphezu kwezi-38 000.
Ujnr De Rocker ekhuluma neLANGA Langesonto uzwakalise ukujabula okukhulu ngokuthola ingane yakhe yokuqala. Uthe yize bejabulile kodwa bavumelene nonina wengane ngokuba bangaqali baveze ingane ezinkundleni zokuxhumana ngoba isencane, ngakho-ke kumele bayihloniphe.
“Ngijabule kakhulu ukuthola ingane yami yokuqala, yinhle futhi inempilo wukuthi nje ngeke ngikwazi ukuyifaka ezinkundleni zokuxhumana ngoba isencane, ngiyayihlonipha,” kusho ujnr.
Uthi usekulungele ukubhekana nezinselelo zokuba ngubaba, wathi uzosebenza kanzima, abambe yonke imisebenzi evelayo ukuze anelise indodakazi yakhe ngakho konke ekudingayo.
Ebuzwa ngobudlelwane bakhe nontando njengoba phambilini kuvele ukuthi bahlukene, uthe ngeke akwazi ukukhuluma ngobudlelwano babo.
“Okwamanje ngisajabulele ingane yami, ngingajabula uma singakhuluma ngayo kuphela singakhulumi ngokunye,” kusho yena. Ekhuluma NELANGA Langesonto untando uzwakalise okukhulu ukujabula ngendodakazi yakhe wangaphawula kakhulu ethi usesemtholampilo.
“Beningeke nje niyilinde ingane yami ize ibe nezinyanga ezintathu bese niyayiveza isiyinhle! Njengamanje ngisemtholampilo ngizocela ukubuyela kuwena sixoxe kahle,” kusho untando obezwakala emoyeni ukuthi ujabule. makhoba@ilanganews.co.za