LIXOLISE NGENKOMO IGCOKAMA ELISHA
SICELE uxolo esizweni nakubathandi bomculo kamasikandi isilomo sikamasikandi, ebesingahoshelani kahle nesinye isilomo salo mculo, ukhuzani ‘Idlamlenze’ Mpungose.
Umthandeni Manqele owaziwa ngegcokama Elisha, ucele uxolo kubona bonke abantu baseningizimu Afrika abathintekile ngokuziphatha kwakhe. Uhambe wayoxolisa ngenkabi yenkomo enkosini yesizwe emdletsheni, ubonga Mdletshe.
Ekhuluma NELANGA Langesonto umthandeni uthe: “Ngikhiphe inkabi okuwuphawu lokuxolisa kubona bonke abathintekile ngendlela umuntu aziphathe ngayo. Ngingasho ngithi ubungane bebusekhona, umuntu akakwazanga ngisho ukuhlonipha eminye yemiyalelo ebiphakanyiswe ngamakhosi.
"Ngibone kufanele ngixolise ngenkabi yenkomo. Indlela okwenzeka ngayo izinto kumasikandi usungathi siqalekisiwe, bekumele ibekhona indlela yokuzehlisa. Kubalandeli bami ngifisa ukusho ukuthi indaba yami nokhuzani Mpungose isiphelile, abantu mabeseke bonke abaculi."
"Ngiyaphinda ngiyasho, ngicela abalandeli bami bahloniphe abasakazi nezintatheli ngoba laba bantu yibona ababalulekile, abakwazi ukusixhumanisa nabalandeli bethu. Nalapho singakwazi ukufinyelela khona, abasakazi bona bayafinyelela ngephimbo, izintatheli zona zifinyelela ngepeni."
"Ngiyafisa abalandeli begcokama beseke bonke abaculi ikakhulukazi ekuthengweni komculo, beseke nabahleli bemicimbi," kusho igcokama. Licacisile ukuthi kalihlawuli kodwa liyaxolisa ngakho konke osekwenzekile okungekuhle obekuthinta igama lalo.
Inkosi yakwampungose, enkandla, uzakhe Mpungose, ithe izijabulele kakhulu lezi zindaba ngoba kade beyilwa le mpi.
Inkosi umdletshe ibuzwa ngalezi zindaba ithe: “Angikho ekhaya, ngisethekwini kodwa sebengifonelile bangitshela ukuthi inkabi isikhona ekhaya.
"Ngijabule kakhulu uma exolisa. Kuningi esisazokwenza, kuhlanganisa nokuthi siye enkandla siyoqedela ukuxolelana. Ngisho umvelinqangi uyakusho lokhu ukuthi uma abantu bengezwene kumele babuye baxolelane," kusho yena. hlongwaj@ilanganews.co.za