KUFEZEKE IPHUPHO LEMINYAKA EMCULWENI KULAYLA
“NGICABANGA ukuthi umculo kimina uwubizo. Ngunkulunkulu ongifake kuwona, yingakho sengiqede iminyaka engaphezu kweyishumi ngikuwona,” kusho ulayla oyintokazi eyaziwa kakhulu engomeni kadj Ganyani ethi Talk To Me.
Ulayla ogama lakhe langempela ngunthabiseng Moamohe usekhiphe i- album yakhe esihloko sithi: Dear Andrew ayibhekise kuyise ongasekho. Uthi uyiqambe ngoyise ngenhloso yokumhlonipha ngoba wayemeseka kakhulu ohambeni lwakhe lwezomculo. Uyise ubulawe wumdlavuza.
Le ntokazi ingeyokuzalwa epinetwon kodwa ngenxa yokufuna amadlelo aluhlaza yagcina isizinze Kwandongaziyaduma, egoli. Uthi ingoma ayenza nodj Ganyani yiyona eyamphendlela isikhala kwezomculo wathola nokwaziwa.
Ngokusho kwakhe uthi i- album yakhe iqondiswe kakhulu kwabesifazane ngoba ukholwa wukuthi kubalulekile ukuzamukela ubuwena.
“Ziningi izinto ezilindelwa wumphakathi esiphila kuwona ngendlela okumele sibe yiyona.
"Kusukela ekutheni kumele siziphathe kanjani, sigqoke kanjani futhi sibukeke kanjani. Ngikubone kubalulekile ukuba ngibe nomyalezo owakhayo emculweni wami ukuze owulalele acoshe okuthile kuwona.
"Kuke kwaba nesikhathi lapho benginendaba kakhulu ukuthi abantu bacabangani ngami kodwa ngokuqhubeka kwesikhathi ngabona ukuthi konke lokho kakungisizi ndawo. Kumele kube yimina engenza abantu bangihloniphe ngendlela engizamukela ngayo nengiziphatha ngayo. Ngizoba yimi, ukuthi omunye ucabangani kanginandaba,” kusho ulayla.
Uthi umculo wakuleli sewukhule kakhulu kodwa kusadingeka ukuba amaciko afunde ukubambisana ewodwa ukuze wonke umuntu akhule. “Singabaculi besifazane sisabhekene nenkinga enkulu emculweni we- house.
"Umuntu uke acabange sengathi ukwenzela isihe uma usebenza naye. Kubalulekile ukuba sizibambe ziqine uma sikulo mkhakha futhi sizazi ukuthi sifuna ukuzuza ini ekugcineni,” kuqhuba yena.
Elandisa ILANGA Langesonto
ngohambo ekwenzeni i- album
yakhe uthi bekungelula neze, bekudingeka azinike sonke isineke ukuze kuphume ulozolo.
“Ngijabule ngokuthi iphupho lami ligcine lifezekile, kwaphuma nento ebengiyifuna, kusho yena.
Ufisa ukusebenza nothandiswa Mazwai, unasty C no-okmalumkoolkat.
“Kuningi engiseza nakho, abantu mabalindele lukhulu. Phezu kwalokho ngisezinhlelweni zokuvakashela phesheya kwezilwandle ngisabalalise umculo wami,” kuphetha ulayla. tzondi@ilanganews.co.za