Uthi ukhetha uwhatsapp kunami
1. NGIHALELA ISOKA LIKA MZALA WAMI
PASTOR: Ngingowesifazane (23) ngiyalotsholwa kepha manje kangimthandisisi lo ongilobolayo, ngifisa ngabe ngilotsholwa yisoka likamzala wami ngoba nginemizwa nalo.
Kangazi ngiyishonisephi le mizwa ngoba naleli soka likamzala ngiyasola liyangithanda ngoba sike sikhiphane silale emahhotela kepha isoka lami nomzala bengazi bona. Ngenzenjani pastor?
IMPENDULO: DADEWETHU mina ngiyabonga nje ukuthi le nto ugcine uyikhuluma ngoba bekungenzeka ukuba usabe ukuyisho, uthole ukuthi ibingaze ikudle ngaphakathi ize ikugojele.
Dadewethu kufanele wazi ukuthi wena njengomuntu awonakele nhlobo kuphela nje yisilingo lesi iningi lethu singabantu esisifikelayo futhi abanye bethu basaqhubeka nokwenza le nto odinga usizo kuyo ngoba lesi silingo abakasinqobi. Dadewethu ngiyakunxusa ngane yakwethu, ungalokothi uqhubeke nale nto ngoba yimbi kakhulu.
Ngiyethemba ukuthi nawe uyayibona ukuthi yimbi, yingakho ungibhalele. Ukuba bekuya ngami bengiyothi phuma manje nje kule nto kungaze konakale izinto eziningi. Unenhlanhla ngoba awukakabanjwa. Kumnandi ukuziyekela into embi kodwa kubuhlungu ukubanjwa.
2. UTHI UKHETHA UWHATSAPP KUNAMI
PASTOR: Ngiyinsizwa ehlukunyezwe wunina wezingane. Ngiyamthanda futhi sesinezingane ezintathu. Inkinga ngiphelelwe wumsebenzi ngingakamloboli yize sengiqalile ukuqoqa.
Uvele wangitshela ukuthi phela yena uyeshelwa, ngamangala. Muva nje nenkonzo yasekameleni sengiyancishwa, akafuni nokuthi ngimthinte. Ngibabikelile abazali bakhe izinto azenzayo njengokukhonza izinkundla zokuxhumana kakhulu kunami, wavele wangitshela ukuthi ukhetha uwhatsapp kunami.
Uthi kunabantu abamqoka axoxa nabo. Nami sengivele ngaqonywa-ke, nginezinyangana nginentombi eceleni kepha ngesaba ukuthi uma engathola lokho angabaleka nezingane zami ngingaphinde ngizibone.
IMPENDULO: PHEPHISA mfowethu ukuba lo dadewethu adlale ngawe kanje kodwa-ke angikubonge ukuthi awukahluthukelwa yinhliziyo uze wenze izinto ezingafanele okuvame ukuba zenziwe ngabanye abantu besilisa uma sebecasukile.
Iningi labantu besilisa uma bezithola bexabana nezithandwa bayaye bazishaye, abanye uthole ukuthi bayazibulala izithandwa zabo uma becasukile. Ibambe kanjalo-ke mfowethu noma nje mangithi libambe noma lishisa - ubudoda yibo lobo.
Lo dadewethu akenzi kahle neze neze uma ekutshela emehlweni ukuthi yena usuke ekhuluma nabantu ababalulekile kunawe kuwhastapp. Ngumuntu wesifazane onjani othi uhleli naye endlini bese ekutshela emehlweni ukuthi yena ukwazi ukuxoxa nabantu ababalulekile kunawe futhi enga- sho nje abazali.
Eqinisweni nje mfowethu ikhona into lo sisi afuna ukukutshela yona. Ngiyesaba ukuhlala othandweni ngoba nakhu uncengile futhi unokwesaba. Kufanele sihlale othandweni ngoba sithandana.
Nokho-ke hlalani phansi nizame ukuthola umuntu enimethembayo, nixoxe ngale ndaba ukuze nithole indlela eya phambili. Eyezingane asingayikhulumi kakhulu ngoba izingane kuyoba ngezenu nize nife, akufanele ube yisigqila ngenxa yokusabela izingane.
Izingane ngezakho, akushintshi. Ngisho umuntu angazithatha aye yinoma yikuphi nazo kodwa iqiniso elingasoze lashintsha lithi izingane ngezakho. Ungesabi mfowethu, umthetho uyokusiza ungenelele mhla ebaleka nazo.
3. AKAFUNI NGAZIWE KUBO
PASTOR: Ngingowesifazane (26) nginenkinga yomuntu engineminyaka eyisihlanu ngithandana naye. Akafuni ngiyobona kubo noma la ahlala khona. Kwala ngisho ngicela ukuvakasha nje isikhashana uvele abalise, kokunye avuke ngolaka. Kangazi noma kukhona angifihlela khona yini.
IMPENDULO: NJALO uma ngiluleka abantu abasha ngivamise ukuthi ungamethembi umuntu ongakwazi kubo.
Empilweni kuvamisile ukuthi uma umuntu ekufihlela ikubo kunento asuke esaba ukuthi hleze kube khona into ozoyazi. Thina-ke nje imvamisa singabantu besilisa kasimuvezi umuntu ekhaya noma kubazali esingazimisele ngaye.
Intombi uyivezela abangani bakho kodwa umuntu ozoba inkosikazi yakho umvezela abazali. Akukho-ke okuningi engigakusho dadewethu, isizulu kasitolikwa. Angithandi sishonelwe yilanga siqagela ukuthi kungani engafuni ukukuveza kubo. Hlakanipha, hlala naye phansi umtshele iqiniso lokuthi iyakulimaza le nto yokungafuni ukukuveza kubo.
4.NGISOTHANDWENI OLUNGESINDAYO
PASTOR: Ngingowesifazane (25) oneminyaka emine ethandana nesoka. Ngenye imini ngamyisa esontweni ngoba ngibona ukuthi kukhona okungahambi kahle kuye, wafika wacela ukukhulekelwa.
Umfundisi wethu uyabholofithelana, wabe esetshela isoka ukuthi lenziwe ngamabomu yizimfamona ukuthi izinto zalo zibe mnyama. Ngamkholwa nami ngoba vele umsebenzi uyawuthola kodwa usheshe uphele, njengamanje uhleli emakhaya.
Useke waya ukuyovela acele isihlobo esihle kithi ngonyaka odlule kwase kuba yinto ephelela emoyeni kanjalo. Usephuza utshwala ngendlela exakile futhi uyabalisa athi ubona sengathi sekuphelile ngaye ufuna ukuzibulala.
Akasasikhandi nesikhathi sami ngenxa yempilo yakhe emile. Ngiyamthanda, ngifisa ukumsiza aphumelele kepha ngibuye ngibone sengathi luwumthwalo lolu thando, ngenzenjani?
IMPENDULO: ASIKUBONGE dadewethu noma sekukubuhlungu nje. Kubuhlungu ukufisela umuntu into enhle neyaphambili uze umuse nasesontweni (church) athandazelwe kodwa kufane nje, kube nhlanga zimuka nomoya. Ngenxa yokuthi ubukeka sengathi unothando lweqiniso ngeke ngakuthathela isinqumo kodwa-ke ngingasika elijikayo ngithi kuwe kubuhlungu ukuzinikela kumuntu ongazinekele kuwe futhi kubuhlungu ukuhlanya ngomuntu ongahlanyi ngawe. Ukuba bengisemsakazweni bengizothi ungabozitshela ngomuntu kanti akakaze akutshele lutho. Unenhlanhla ngoba zonke lezi zinto zenzeka nje nisazijolela. Ngiyazibuza nje ukuthi uma umfundi- si wenu enithandazela wayethi uthandazela obani noma mhla eniphrofetha wayethi uphrofetha obani ngoba umjolo awunadlozi futhi awunankulunkulu. Uma kunento ongayiboni kahle emjolweni ungabovalelisa kodwa nyamala njengentuthu kagwayi.
5. NGIMBAMBELE AMAGQUBU UMYENI
PASTOR: Ngingowesifazane onomyeni obehlupha phambilini, ethanda izintombi lwaze lwancipha uthando lwakhe kimi. Bengimkhuza kule ntombi, adlulele kwenye manje uthi useshitshile kodwa sekunzima ukumkholwa ngoba sekuvele kuvuke amagqubu.
Ngisho esekhombisa kangakanani ukuthi uyangithanda kuvele kubuye zonke lezi zinto abekade ezenza ikakhulukazi uma ngike ngabona eyodwa yezintombi abethandana nazo ngifika endlini kungasavumi ngimkhulumise.
IMPENDULO: PHEPHISA dadewethu kule simo obhekene naso kodwa bese ulazi iqiniso lokuthi ingqodo yethu singabantu besilisa ike idide nje. Ngiqonde ukuthi uma umuntu wesilisa exolisa kuwe muntu wesifazane kuba sengathi uxolisa kwikhompyutha kanti akunjalo kodwa uma uzoxola kuyaye kuthathe isikhathi.
Ngiyafisa leli qiniso sonke singabantu silamukele futhi silazi ukuthi uma umuntu exolisa kuwe uyaye acabange ukuthi uma nje eqeda ukuxolisa nakuwena owamukela uxolo futhi kusuke sekudlulile. Igqubu dadewethu ngiyalisaba ngoba libulala wena osuke ulibambile.
Yikho noma ungaya kuphi uyozwa iseluleko sithi ungake ulinge ubambe igqubu. Eqinisweni ukuze abantu abathandanayo bahlale ndawonye othandweni lwabo kufanele bafunde uxolelana zonke izinsuku ngoba vele sivamisile singabantu ukuthi sonane nsuku zonke.
Ngiyacela dadewethu uma umuntu wakho umthanda mnike elinye ithuba ngisho ngoba uthi wena useshintshile. Kanti yini into umuntu ekumele ayenze othandweni ukuze kubuyelwane edlula ukushintsha. Qaphela, ungabomlahla umuntu uma eshintsha futhi ekhombisa ukuphenduka.
6. NGIFISA NOMGQOMO WOKULAHLA INDODANA
PASTOR: Nginomfana (19) ongazi ukuthi liyaphuma noma liyashona na empilweni. Uyabhema, nasekhanda usebuye angisolise sengathi akasathathi kahle ngendlela anamanga ngayo.
Muva nje udle imali yesikole ngoba nakhona ngimncenga ngesikole ngithi ngenzela abe no-matric. Bese ngimfake E-FET college kepha ngiyabona ukuthi kayikho le nto. Iyangihlukumeza le nto yalo mntwana pastor, ukube kunomgqomo kadoti ngabe ngiyamlahla ngiqhubeke nempilo. Siza nceku.
IMPENDULO: NGANE yakwethu ngenhlanhla kawukho umgqomo wokulahla umuntu. Angikubongele ukuthi kuze kube yimanje usami nayo ingane yakho nakuba ikuhlupha kangaka. Kunzima ukuba ngumzali, ubuzali yibona-ke lobo.
Phela ukuba ngumzali akusiwona amakhekhe. Dadewethu kulo mhlaba sonke kufanele sazi ukuthi izingane ziyaphoxa noma kunjalo ingane ayilahlwa. Ngiyakuthembisa ukuthi ngelinye ilanga lo mntwana wakho okuhluphayo uyobe eseluleka abanye abantwana mhlawumbe eseluleka nesizwe ngokuziphatha kahle, uma mina Zondo ngiluleka abantu ukuthi abaziphathe kahle, bahloniphe cishe ubaba wami umangele lapho ekhona (ethuneni lakhe) ngendlela engamhlupha ngayo.
Cishe akakholwa yile nto engiyitshela abantu ngenxa yendlela engamuhlupha ngayo. Ingane yakho iyokumangaza uze ufe. Ingane iyokumangaza ngezinto ezibhedayo ezingasile ezenzayo futhi iyokumangaza ngezinto ezinhle nezinkulu eyozenza cishe ezinye ongakaze uyifundise zona. Sonke sabahlupha abazali.
* Kubo bonke abafundi bephephandaba lethu ILANGA, siyafisa ukuthi sisizane futhi ngiyafisa ukuniphendula nonke kepha ngebhadi ucingo noma inombolo iyodwa ngakho akulula ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
* Upastor Sthembiso Zondo ngumeluleki nomethuli wezinkulumo ezakhayo. Wethula inkulumo ekhuthazayo ngolwesine bese ephendula imibuzo yabafundi ngezinkinga zempilo nezothando KWILANGA Langesonto.
Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kufacebook: Sthembiso Zondo Fan page noma kuwhatsapp: 082 070 8034. Abafisa ukukhonza nathi, bazosithola njalo ngesonto ngo-10h00 kunombolo 110 Williams Road ngaseda
lbridge.