Zibhekwe ngabomvu izinqumo kweye-anc
ABANTU b aseningizimu Afrika balindele ngabomvu ukuzwa izinqumo ezizothathwa engqungqutheleni yokudingida ngenqubomgobo yombutho we-african National Congress (ANC) eqhubeka enasrec Expo Centre, egoli.
Kuyiqiniso elingephikwe ukuthi yingqungquthela ebaluleke kakhulu lena, hhayi nje kuphela kumalunga E-ANC kodwa kubantu bonke baseningizimu Afrika. Sikusho lokhu ngoba phela I-ANC yilona qembu elibusa izwe njengamanje. Siyazi-ke ukuthi ziningi izinkinga ezikhungethe iningizimu Afrika. Silindele kakhulu ukuzwa ekupheleni kwale ngqungquthela ukuthi yini I-ANC ezoyishintsha emigomeni yayo noma ezoyenza kangcono ukubhekana nezinkinga izwe elibhekene nazo. Kanjalo nokwenza ngcono impilo yabantu baseningizimu Afrika, kunciphe ububha, kuthuthukiswe izwe lethu. Siyethemba ukuthi lezo zinqumo ezizothathwa kule ngqungquthela ngeke nje zigcinwe zilotshwe emiqingweni yemibhalo kodwa sizobona zisetshenziswa ( impleme-ntation) ekuthuthukiseni izwe.
Ezintweni nje esizibheke kakhulu yimigomo emayelana nokuthuthukiswa komnotho wezwe ondondayo njengamanje, okubandakanya nokuthuthukiswa kosomabhizinisi abamnyama abasathwele kanzima, abanye ababhekene nenkinga yokucindezelwa ngabezinkampani ezinkulu. Siyafisa kakhulu nje ukuba uhlelo olusematheni kulezi zinsuku lokuthuthukiswa komnotho olubizwa nge-economic Transformation lucaciswe bha ukuthi luzosebenza kanjani. Kule migomo yokuthuthukiswa komnotho makungabi ngezohlomulisa osopolitiki abaphezulu nobhululu babo, kucindezeleke abasemazingeni aphansi.
Makube yimigomo ngempela ecacisa ngezinhlelo zomnotho ezizothuthukisa bonke abantu abasemazingeni ahlukene empilo, ikakhulukazi labo abasancisheke amathuba. Kudingeka ukuba icace indaba yokuthi lizovalwa kanjani igebe elikhona kwezomnotho. Indaba yemfundo yamahhala isemqoka kakhulu nayo, siyafuna ukuzwa ukuthi I-ANC izoqinisekisa kanjani ukuthi labo abafane-lwe wukuyithola bayayithola. Kule ngqungquthela kufanele kuvele imigomo ecacile ezolawula uku-hlinzekwa kwemfundo yamahhala.
Cishe lokho kungagwema isiphithiphithi semikhankaso efana nofees Must Fall yokulwela imfundo yamahhala. Kwezithinta inhlalakahle yomphakathi siyafisa ukuba ibhekwe indaba yomphakathi obukeka unganakiwe kakhulu okhula ngesivinini ikakhulukazi intsha ehlala emigwaqweni, ibheme izidakamizwa. Le nkinga inkulu kodwa kubukeka ingasukunyelwa ngendlela egculisayo. Asilindele neze-ke ukuba I-ANC iqhamuke nezinto ezingamaphupho ayo nje, ezingeke zifezeke.
Uma isivezela amaphupho ayo lokho kungasidalela inkinga emphakathi, kube neziphithiphithi. Mayithathe isinqumo ngezinto ezizokwenzeka, hhayi nje izinto ezizoba yimihlobiso emiqulwini yamabhuku ayo. Kungakuhle nje ukuba amalunga E-ANC ngesikhathi edingida ngenqubomgomo yayo akubeke eceleni ukushayisana noqhekeko olukhona embuthweni, akhumbule ukuthi izinqumo azenzayo zithinta abantu bonke ezweni. Yebo kuzoba khona ukungaboni ngaso linye ngesikhathi kuqhubeka izingxoxo kodwa kufanele kugcine kufinyelelwe ezivumelwaneni ngezinqumo ezizobeka phambili izwe nabantu baseningizimu Afrika.