Umqeqeshi wegermany uzishaya isifuba
UYAZIQHENYA ngomsebenzi omuhle wabadlali bakhe abancane ngeminyaka yobudala ujoachim Loew ( osesithombeni) ongumqeqeshi wegermany ezodudulana nechile kowamanqamu wefederation of International Football Association (Fifa) Confederations Cup namuhla ngesonto ngo-20h00 erussia.
Lo mqeqeshi ushiye izinsika zeGermany eziyisize inqoba indebe yomhlaba ngowezi-2014 ebrazil. Uzeseke ngokuthi ufuna ukuba nabadlali abaningi azokhetha kubona inqanawe yesikwati azovikela ngaso indebe yomhlaba ezogijinyelwa erussia ngonyaka ozayo.
Ngaphezu kwalokhu, uthi ufuna abadlali abancane bakujwayele ukudlalela izwe ukuze nxa sebekhathala abadala angaqali phansi wonke umsebenzi. Abadlali bakhe abancane benza kahle kakhulu njengoba kumanje uleon Goretzka oneminyaka engama-22 ubudala notimo Werner onengama-21 behamba phambili ngamagoli amathathu kulo mqhudelwano. Laba badlali bavalele amagoli amqoka igermany ibhudluza imexico ngo-4-1 kowandulela owamanqamu. Ichile ihlule iportugal sekukhahlelwa amaphenathi ukuzibekisela indawo kowamanqamu.
Ichile negermany badlale ngokulingana kuba ngu-1-1 esigabeni samaqoqo.
Uloew uthi ubengakubhekile ukunqoba lo mqhudelwano, kodwa abadlali bakhe bona bawubheke ngabomvu.
“Mina sengikutholile ebengikufuna. Sengibonile ukuthi sinekusasa eliqhakazile egermany njengoba abadlali bethu abancane abaqalayo ukudlalela izwe begila izimanga. Akukholakali ukuthi lesi sikwati sibunjwe emasontweni ambalwa ngaphambi kokuza kulo mqhudelwano.
“Abadlali bathi bafuna ukuyijuqa ichile. Bakholwa wukuthi bekumele bawunqobe umdlalo wamaqoqo. Okuhle nje wukuthi baneme ngokweqile ekhempini okuyinto engibona izobenza banqobe le nkomishi. Ichile inzima futhi ngiyazi ukuthi izokwenza konke okusemandleni ukuze isehlule. Nokho-ke nathi sihlomile yize sisebenzisa abadlali abangenaso isipiliyoni,” kusho lo mqeqeshi.
Imexico izodudulana neportugal namuhla ngesonto ngo-14h00 kowokubanga indawo yesithathu emoscow.