Ingozi enyonyobela usuthu nethanda
NGIYIBONA ivuthwa indlela ebheke ehlathini kwikilabhu ezogcina igijima kwi-absa Premiership ngesizini ezayo phakathi kwethanda Royal Zulu namazulu FC abasalinde isinqumo esiwujuqu kwiPremier Soccer League (PSL) ngokuphasiswa kwesicelo sabo sokudayiselana.
Ithanda idayisela usuthu ilungelo lokudlala kwipremiership. Lolu daba beluhlalelwe yinational Executive Committee (NEC) YEPSL ngolwesine. Kuthiwa IPSL ivumile ukuthi la makilabhu athengiselane, kodwa idinga izinto ezithile bese usuthu lunikwa igunya lokugijima kwipremiership. Kuthiwa kumele kuhanjiswe ubufakazi bokukhokhelana isamba okudayiselwana ngaso nesiqiniseko sekusasa labadlali bawo womabili la makilabhu.
Lokhu IPSL ikwenzela ukungangeni ehlazweni abadlali bebalisa ngokuthi baxoshwe yikilabhu ethile ekubeni bebenezinkontileka.
Ukudonsa kwalolu daba ngikubona kuyingozi enyonyobela ikilabhu ezogcina isigijima kwipremiership. Kumanje usuthu aluqondakali ukuthi lwenza amalungiselelo okudlala kwipremiership noma okuqhubeka kwinational First Division (NFD). Lesi yisikhathi sokungena emakethe nokuhlela amakhempu nemidlalo yobungani ngaphambi kokuqala kwesizini.
Awukwazi ukulungiselela ipremiership sekusele amanenjana ezinsuku kuvulwe imidlalo yepremiership.
Ukunyonyoba kwalezi zihlelo kuzoholela ekutheni usuthu lugcine lusayinisa uvucu olulaxazwe ngamanye amakilabhu. Lokhu ngikubona kufana nekilabhu engene kwipremiership ngokunqoba amaplay off njengoba phambilini ebephela sekusele isikhashana kuqale isizini.
Ijomo Cosmos kuke kwayenza lokhu inqoba ama- play off amakilabhu esebuya emakhempini okulungiselela isizini entsha yavika izembe zisuka nje. Bebengasekho abadlali emakethe kwathi abangaphandle kwathatha isikhathi ukuthola izimvume zokusebenza kuleli.
Iqhathwe namakilabhu amakhulu imidlalo ilandelana yavika izembe zisuka nje ebhandeni. Lesi simo ngisibona sizogadla kabuhlungu osuthwini. Nakwithanda kuzokuba ngesifanayo nxa IPSL igcina ngokukuchitha ukuthe- ngiselana kwabo. Yize upierre Delvaux ongumnikazi wethanda ebeka izizathu zokuntula imali yokuqhubeka nekilabhu, kodwa abanye bathi ubalekela ukuthi kungenzeka aboshelwe amanqina enyathi ukuze abuyele ehlathini kwazise akanuki amakha amnandi kwabathile kwipsl njengoba eke wajikijela le nhlangano kwicourt of Arbitration for Sport (Cas) kubangwa ukuthi kungani kunyuselwe kwipremiership ipolokwane City ekubeni nayo ibitelekile ngesikhathi kunesiteleka samakilabhu akwinfd esiholele ekutheni isizini isongwe imidlalo ingalingani.
Abantu bebhola bayaziwa ukuthi baphila ngenzondo namagqubu. Ngokweso lebhizinisi udelvaux uthathe isinqumo esifanele njengoba ezokwenza imali eshisiwe ngokuthengisa kunokungena kwipremiership enovalo lokugencwa yizembe. Nokhoke kungaba yishwa nxa usuthu lunganikwa igunya lokudlala kwipremiership bese ludliwa yizembe ngokusongwa kwesizini.
Phela lokhu kuzokube kusho ukuthi luthathe izigidi zemali lwaziphonsa olwa- ndle, okubukeka kunganembi kahle ngokweso lebhizinisi. Nokho usuthu luholwa ngabantu abavuthiwe kwezobuholi engicabanga ukuthi bakhumbula kahle ukuthi luthenge ilungelo ledynamos kapat Malabela lokudlala kwipremiership nangowezi-2006.
Beluhlale lusengcupheni yezembe kwaze kwaba liyayigojela kumasizini ambalwa edlule. Imali kamalabela ikhokhwe sekujikijelwana ezinkantolo.
Okungishayisa ngovalo ngosuthu wukuthi awukwazi ukuhluleka ukungena ngezikhwepha zakho kwipremiership bese uthembela ekuthengeni igunya. Ukungangeni kwipremiership ngokwami kuchaza ukuthi usuthu kalukulungele ukudlala kulesi sigaba.
Ingane engaphumelelanga ebangeni elithile iphinda ikilasi elifanayo ngonyaka olandelayo. Leyo ngane isuke ithathwa ngokuthi ngisho ingadudulwa kodwa ngeke nangengozi iphumelele ebangeni elilandelayo ngoba isuke isafanelwe yileli elifeyilile. Okuhle kunakho konke nje wukuthi ikwazuluNatal izokuba namakilabhu amathathu kwipremiership ngesizini ezayo kungakhathaleki ukuthi IPSL ithatha siphi isinqumo njengoba kunelamontville Golden Arrows nemaritzburg United.