Konke kuvuna isundowns kwicaf
Nokho isahlalelwe umsebenzi omkhulu
ISAHLALELWE umsebenzi omkhulu imamelodi Sundowns edlulele kumaquarter final ecaf Champions League.
Ibuye namaphuzu agcwele ekuhambeni inqoba isaint George yase-ethiopia ngo-1-0 wegoli lika-anthony “Sika Lekhekhe” Laffor elingene ngomzuzu wama-85 koka- group C izolo ngomgqibelo ntambama e-addis Ababa Stadium.
Udenis Onyango ovimbela idowns uphenduke iqhawe lale kilabhu ebamba iphenathi ngomzuzu wama-45 kulo mdlalo. Ibidaleke ngemuva kokuba u-anele Ngcongca ebambe ibhola ngesandla ebhokisini. Lo nozinti obevimba ngisho impukane ezintini kuke kwaba nokwesaba elimala ngomzuzu wama-66. Nokho unyangiwe maqede wabuyela ensimini.
Nakuba inkundla yonke ibigcwele umbala osawolintshi ogqokwa ngosokhaya, kodwa abalandeli besaint George babuyele emakhaya bephoxekile. Yize idliwe isaint George kodwa ukwesekwa kwayo ngalolu hlobo kuphonsela inselelo idowns njengoba ibukwa yimithonsenyana nxa igijimela kuleli yize ibalwa namakilabhu adlala ingcwenga yebhola e-afrika.
Le kilabhu eholwa ngupatrice Motsepe ongumengameli kubukeka ihluleka ingcaca ukuzidayisa kubalandeli njengoba ingakaze ihambele amadolobha amakhulu aseningizimu Afrika ukukhangisa ngenkomishi yecaf emizamweni yokuheha abalandeli abasha.
Le kilabhu ihlulwa wukusebenzisa leli thuba lokuzidayisa esikhathini lapho abalandeli abaningi bephoxwa wukubhacaza kwekaizer Chiefs ne-orlando Pirates abalandelwa yizinkumbi kuleli.
La makilabhu akwazi ukugcwalisa phama izinkundla uma efinyelela kweyamanqamu okufakazeleke kalula nangeledlule ibucs ihlulwa yisupersport United ngo-4-1 kowenedbank Cup emoses Mabhida Stadium, ethekwini. Ezimnyama zinele zaguqa nje, inkundla yasala nenkeshezana yabalandeli ukuhalalisela isupersport.
Isundowns ibukeka idlala kahle ekuhambeni kwicaf njengoba ingakaze ihluleke ukubuya nomphumela ogculisayo emazweni angaphandle.
Nokho isike yaguqa ekhaya ishaywa yi-esperance yasetunisia ngo-2-1.
Kayiqali ukwenza kahle ekuhambeni kweyamaqoqo njengoba ibhambabule I-AS Vita Club yasedemocratic Republic of Congo (DRC) ngo-3-1 muva nje emdlalweni obugcwele phama. Kungena elevita nje, ibambane ne-esperance ngo-2-2 izolo EDRC okuyikhiphe embangweni wokuya kuma- quarter final. Idowns izokwamukela ivita emdlalweni wokugcina wamaqoqo ozokuba ngempelasonto kuleli kuthi i-esperance ibhekane nest George.
Iplatinum Stars isidlalela ukugcina icala kwicaf Confederations Cup emuva kokuhlulwa yimc Alger yaseAlgeria ngo-2-0 ngolwesihlanu ekuhambeni.
Le kilabhu ebambe ibhuleki eqoqweni layo izobhekana neMbabane Swallows yaseswaziland ngempelasonto ekhaya.