Bayizwe ngendaba IVDJ abe-anc
BAPHUTHELWE yivodacom Durban July (VDJ), ebisegreyville Racecourse izolo ngomgqibelo ethekwini, osondonzima be-african National Congress (ANC) abavamise ukuhambela lo mcimbi.
Ukuphuthelwa kwabo kudalwe wukuqondana kwe-vdj nengqungquthela YE-ANC emqoka, eqale ngolwesihlanu ize iphele ngolwesithathu, enasrec Expo Centre, egoli, lapho kudingidwa khona ngenqubomgomo yayo.
I-VDJ yethanyelwa kakhulu ngo sondo nzima abangosomabhizinisi, wosopolitiki abaqavile, wosaziwayo nomphakathi jikelele.
Umengameli wezwe, umnu Jacob Zuma, naye uvamisile ukubonakala kulo mcimbi kanjalo nabanye abaholi kodwa izolo akazange abonakale. Ngolwesihlanu ILANGA
Langesonto likhulume nabantu abehlukene okubalwa kubona nosomabhizinisi ngenhloso yokuthola imibono yabo ngokushayisana kwale micimbi.
Abanye bathe kungase kube nomthelela ongemuhle kulabo abaqhuba ibhizinisi ngevdj, abanye bathi ngeke kube namthelela otheni.
Uma x Mqadi ongusomabhizinisi futhi ongumnikazi wendawo yokuzijabulisa emlazi, imaxi’s Lifestyle, ukubize ngento eyibhadi ukuqondana kwale micimbi, kodwa wathi akukho okungenziwa. Uthe ukungabibikho kwabaholi bakakhongolose kuzoba nawo umthelela ongemuhle, nokho ongemkhulu kangako.
“Lezi zinto ziyenzeka, zifana nokufa. Bebethanda ukuba khona kodwa kwangenzeka ngenxa yomsebenzi. Khona kuqondane kabi,” kusho yena.
Uthe umsebenzi oyokwenziwa yilezi zikhulu kule ngqungquthela ubaluleke kakhulu kunokuba kwi-vdj.
"Kumele kukhunjulwe ukuthi umsebenzi wabo wokunakekela abantu, yiwona abawuqashelwe. Ibhizinisi lizoqhubeka bekhona noma bengekho,” kusho umqadi.
Uqhube wathi nakuba bengekho osondonzima BE-ANC kodwa bakhona abanye abantu nosomabhizinisi abazoba khona.
“Okumele kucace wukuthi kakusiyo I-ANC eza kwamax kodwa ngabantu abajwayelekile nosomabhizinisi. Uma sithi ibhizinisi lizowa uma bengekho, kusho ukuthi sibafanisa namablesser kanti akunjalo,” kusho umqadi.
U-amukelwa Sithole, okhulumela enye indawo yobumnandi ethekwini ebizwa ngokuthi yigagasini MVG Lounge, uthi ngeke bathinteke nakancane ngenxa yokuqondana kwale micimbi.
“Abantu bayabuthanda ubumnandi, ngisho ingaya kuphi ingqungquthela asinankinga. Sinamakhasimende kuwo wonke amakhona omhlaba, thina silinde abathandi bentokozo kuphela,” kusho yena.
Umthunzi Gumede, okhulumela imeya yetheku, unkk Zandile Gumede, ukuqinisekisile kuleli phephandaba ngolwesihlanu ukuthi (imeya) ibingezukuya kwivdj ngenxa yokuba matasa ngemisebenzi yenhlangano (ANC), kodwa wathi akakholwa wukuthi ukungabi bikho kosopolitiki BE-ANC kungase kube nomthelela omubi.
“Osomabhizinisi bakhona kanti namahhotela agcwele. Kasicabangi ukuthi ingqungquthela izoba nomthelela ongemuhle,” kuchaza yena. Omunye wesifazane enkundleni yokuxhumana, i-insta- gram, ululama Mabude, uzwakalise ukungenami kwakhe ngokuqondana kwale micimbi.
Ubhale ekhasini lakhe ukuthi I-ANC ngeke ilinuke ivoti lakhe ngonyaka ozayo ngenxa yokuthi yenze ingqungquthela yaqondana NEVDJ.
I-VDJ ngomunye wemicimbi obalulekile kwikhalenda lemicimbi ethekwini nasesifundazweni njengoba uneqhaza emnothweni nasembonini yezokuvakasha. Abasuke beze kulo mcimbi bachitha izizumbulu zemali bezithokozisa, okuyinto ethuthukisa umnotho wedolobha.
Lokhu kwenza itheku ligcwale ikakhulukazi ezindaweni zobumnandi, kube nemicimbi ehambisana neye-vdj (after parties).