SIHLAZIYA AMA-CD
UMCULI: THANDEKA RADEBE ISIHLOKO: BAYEKE BAHLEKE UHLOBO LOMCULO: UMASIKANDI OXUBE IGOSPEL UNYAKA: 2017 AMAPHUZU: 6/10
IHLASELA ngephimbo le ntokazi. Iwuhlanganise kamnandi umculo kamasikandi nowokholo. Izinsimbi namaphimbo kuhlanganiswe kamnandi, ungacishe uvukwe ngumoya uma uyilalele, kuyasho ukuthi umculo wamazayoni ungaphakathi kuyo. Ngeke bazisole abazoyithenga lealbhamu.
I-albhamu inezingoma eziyi-10, phakathi kwazo kukhona nebayeke bahleke, Ayingeni imithwalo nethi Ngena nami. Utholakala enombolweni kamakhalekhukhwini ethi 074 610 6841.
UMCULI: BUHLE B ISIHLOKO: JAWEH IS YOUR NAME
UHLOBO LOMCULO: GOSPEL UNYAKA: 2017 AMAPHUZU: 5/10
UBUHLE ucula i-gospel epholile, ehamba negazi. Le albhamu idle ngezingoma eziqanjiwe ezixoxa indaba yevangeli. Ulandela isitayela sokubalisa nokukhala nokunxusa ngephimbo lakhe. Abamdlalela izinsimbi sengathi bangazinika isikhathi bamthakele imisindo ehambisana nezingoma zakhe bese uphrojusa wakhe ambonise ukushintsha okhiye acula ngabo ngokwezingoma, angaculi ngenothi elilodwa. Ziyi-14 sezizonke izingoma. Inombolo atholakala kuyo ithi 079 673 2166.
UMCULI: MSHIKASHIKA ISIHLOKO: KUFEZIWE UHLOBO LOMCULO: UMASIKANDI WALEMIHLA UNYAKA: 2017 AMAPHUZU: 5/10
UMSHIKASHIKA uyagalela. Iyasho intambo, izingoma zakhe zimnandi, zishaya khona. Zihlelekile futhi zinezithako ezidingekayo emculweni. Kule albhamu izingoma zinomehluko kwezinye.
Ziyi-13 izingoma sezizonke, zilamana kanje: Omalume banonya, Kufa, Half ground, Ekhweni lami, Igomondela, Was nice to be with you, John Cena, Kugiya mina, Wedlule, Ahambile amaqhawe, Thandeka, ne-remix. Batholakala enombolweni kamakhalekhukhwini ethi 078 559 3645.
UMCULI: PHUMLANI HADEBE ISIHLOKO: ANGIKAZE NGIMBONE
UHLOBO LOMCULO: GOSPEL UNYAKA: 2017 AMAPHUZU: 6/10
IKHUPHULA isithunywa le nsizwa ngephimbo layo. Ingoma yokuqala isho ufise ukuyizwa neyesibili. Kumele kube njalo kubahleli bezingoma. Bazoyithokozela abathandi be-gospel le albhamu.
Ziyi-14 sezizonke izingoma kule albhamu, phakathi kwazo kukhona nezithi Uphakeme, Hlala kuye nekhumbula umenzi. Utholakala enombolweni kamakhalekhukhwini ethi 073 900 7537. knowledge.simelane@ilanganews.co.za