Woza nazo mzala
UNGAPHAKAMI!
AMANDA Black lempakamo oza nayo izokukhathaza ntombazane - ngiyabona ukuthi ngezindondo nje ezimbalwa, usuvele wanguphakamile. Awungitshele le nto oyenze kugu Jazz Festival ngesonto eledlule ibizwa ngani? Kungathi izinkumbi zabantu zikhokhele ukuyobuka wena, bese uvele ukhetha ukucula abantu bengakafiki.
Kahle bo wena ukuzitshela, uzowa bhu phansi uma uza ngomphapho, kuzophela konke lokhu kuphakama onakho. Phela wena awuhlukile nomuntu owantshontsha imali yabantu abebehambele Ugu. Awusho-ke uchazekile-ke usucula wedwa kungekho muntu? Uchazekile wukuculela onogada?
KHULA MANJE MSAWAWA
MSAWAWA mfana wami angazi noma namanje nisahlangene nobaba wakho niyagoqana yini.
Le nto yokuvele umemeze ezingomeni zakho iyacika, phela usumdala manje sekumele ucule njengendoda. Lo mdanso wakho omusha angiwuboni uphumelela ngoba awulaleleki, uyamemeza.
Kungcono uvele ube ngumdansi nje kuphela. Niyeke ukukhohlisana nobaba wakho. Nezimbuzi senizinqume kakhulu manje nikhohlisana ngokuthi uzoba nenhlanhla. Ake ninikele esontweni manje, mhlambe uzosizakala.
UBASHONISEPHI ABAFANA THINAH
WETHINAH Zungu awusho, umthetho wakho uthwele yini ngezingane zabafana ezincane. Kule ngoma yakho ethi “Ngithandiwe” walanda abanye abafana ababili ababecula kamnandi bebukeka benekusasa eliqhakazile. Sithe sisababhekile, wavele wavumbuka nomunye kule ngoma opikwe kuyona ethi “Ujesu Ufika Ekuseni.”
Naye lo simthandile kodwa baphi laba abanye abafana? Uma kuwukuthi uthwele ngabo kuyokusiza ukubaphatha kahle ungabalahli.
BONGA UMZALA PHELA L'VOVO
L’VOVO sicela ungabi wugombela kwesakhe. Bonga kumzala ngokukuphaphamisa emasontweni adlule. Phela wena ubusuzihlalela erenki nje, usukhohliwe wumsebenzi wakho.
Kodwa kusukela umzala ecele ukucaciselwa ngawe usukume wazithatha. Sethembe-ke izokusebenzela le ngoma yakho amahundred kodwa mina ngisamile ekutheni itekisi likufanele, hlukana nomculo.
YAZINI NTANDO INGANE NGE-INSTA...
HHAY’ bo, liphezulu izinga lokuphapha kwabanye osaziwayo, bavele benze izinto ezingenangqondo nje. Kodwa lo sisi okuthiwa nguntando Duma okuke kwavela amahlebezi okuthi waliwe yindoda wenzani ngempela!
Ngimangele nje esevulela ingane yakhe ikhasi kwi-instagram ingakaqedi ngisho isonto elilodwa izelwe. Awutshele umzala wentando, le ngane oyivulela ikhasi yazini ngo-instagram? Izobe i- poster ini vele?
Isiyakwazi yini vele ukushutha, ibhale? Ngibonile ukuthi isinenqwaba yabalandeli kuleli khasi layo. Akungethusi-ke lokhu ngoba vele ezinkundleni zokuxhumana kugcwele amathatha. Uma ungababuza nje ukuthi bayilandela nani ingane ngeke bakutshele. Ake nehlise ukupaqa zingane zakwethu.