Uxhaso lwezimali kubaculi
BAZOTHOLA uxhaso lwezimali abaculi abafisa ukujikeleza izindawo ezahlukene, basabalalise umculo wabo kodwa ababhekene nesimo sokweswela imali.
Isikhwama soxhaso esisungulwe yiconcerts SA, engaphansi kwesouthern African Music Rights Organisation (SAMRO) Foundation sisiza abaculi abafisa ukuvakashela kwezinye izingxenye zeningizimu Afrika nakwamanye amazwe akhelene nayo ayingxenye yesouthern African Development Community (SADC).
Lesi sikhwama esibizwa ngemobility Fund, sisiza abaculi uma befuna ukucula bukhoma ( live per
fomance), befisa ukuhlanganiswa nabanye abaculi.
Kubikwa ukuthi ngale phrojekthi kuhlose ukukhulisa izinga lomculo oculwa bukhoma. Phakathi kwamaciko aseke ahlomula kulesi sikhwama kubalwa umadala Kunene, utu Nokwe, u-andre Petersen, uwendy Oldfield, Mark Fransman, umsaki nabanye.
Umsaki uthi ukusebenzisana nesikhwama esinjengalesi kunomvuzo.
“Wonke umculi ozimele uyazi ukuthi kunzima kanjani ukuvakashela izindawo ezahlukene kodwa uma unebhendi yabantu abalishumi kusuke sekungaphezu kwamandla.
"Iconcerts SA inginike amandla okukwazi ukuba nginyakaze. Selokhu ngikwaze ukuyocula ebushfire, eswaziland, ngikwazile ukuba ngithole namanye amagigi,” kusho yena.
Lesi sikhwama siphinde sisize abaculi ngokubamaketha, yimali yokuhamba, eyokuzibheka bona neyokukhokhela izinsimbi, amavisa nokunye.
Abaculi abasuka ezifundazweni ezahlukene bayamenywa ukuba bafake izicelo uma kunephrojekthi abafisa ukuyenza eningizimu Afrika kodwa ngaphandle kwesifundazwe abahlala kusona.
Abafaka izicelo bangacela imali engafinyelela ku-r30, 000. Uma kuzoyiwa emazweni angaphandle afana no-angola, ibotswana, idemocratic Republic of Congo, ilesotho, imadagascar, imalawi, imauritius, imozambique, inamibia, iseychelles, iswaziland, itanzania, izambia ne-zimbabwe.
Kungaba yimali engafinyelela ku-r45,000.
Ukwamukelwa kwezicelo kugcina mhla zingama-23 kuntulikazi (July) kuwo lo nyaka kanti umjikelezo wamakhonsathi kumele ube maphakathi noncwaba (August) nonyaka kuya kunhlolanja (February) ngonyaka ozayo.