UYABONAKALA UMCULI OCULA INTO AYIPHILAYO
ABACULE into abayiphilayo abaculi bomculo wokholo bangafarisi unkulunkulu bamenze umpompi wamanzi wona umuntu oya kuwona uma omile ethi angawagcwalisa isisu ashaye achithe.
Kunekhorasi elithi “Izulu liyasetshenzelwa”.
Liqinisile leli khorasi, abaculi bomculo wokholo baya kuwona belule izintamo okwamagalikuni behalela imali kajehova bebe bengamfuni futhi bengamsebenzeli.
Abaculi balolu hlobo lomculo mabazi ukuthi bafana nse nezinceku nabo bonke abashumayeli nabefundisi. Elabo ivangeli liyashesha ukungena ezinhliziyweni zabantu ngoba umculo umnandi.
Umculo uyiphilisi lomphefumulo, uma kuliwa yiwona phambili, uma kujatshulwe yiwona futhi, ungena ngezindlebe kodwa welapha umzimba wonke.
Inkonzo engenawo umculo kufana nokuthi umuntu usukele uphuthu walukhuma lungenasishebo.
Yingakho izwi lisikhuthaza ukuba simdumise ngazo zonke izimfijoli umdali.
Baningi abaculi esibaziyo abaduma ngomculo wokholo, izinkumbi zabalandela kwathi phakathi nokhalo kwavela ukuthi bambethe izikhumba zezimvu, bayizimpisi zoqobo.
Sesifikile isikhathi sokuba amakholwa ayivikele into yawo, abaqonde ngqo abaculi abadlala ngevangeli.
Kuyadumaza ukubona abantu bezibiza ngabazalwane becula baze bakhale emicimbini kuphenduke abantu, kube wukuphuma nje emnyango, ubathole sebebhuquza bedakwe bengazazi namagama abo.
Abanye bathuka inhlamba, babodwa abenza izenzo zokuphinga kuthi uma bekhuzwa bavike ngokuthi umuntu akathathe umyalezo angabheki bona.
Njengoba unkulunkulu engoMdala wezinsuku, uyawabona wonke amasela agaqele ifa lezingane zakhe ezimkhonza ngeqiniso ezidlulisa umyalezo.
Imvamisa yabazenzisi abacula lo mculo befeza izinhloso zabo, kuthi uma esebaphuca okungokwakhe, umculo ungasathengwa bakhombe abanye ngeminwe sebekhohliwe wukuthi bangamasela.
Umculi ocula into ayiphilayo uyezwakala ekhipha iphimbo lakhe eligcotshiwe elinyakazisa izibili kucace ukuthi akahambi yedwa kepha umoya oyingcwele ungaphakathi kuye uyamlawula.
Kumele ophrojusa baqikelele ukubahlola abaculi uma bezobaqopha kuthi uma sebebakhiphela emphakathini kwazeke ukuthi baphila yiphi impilo ukuze umphakathi umazi ukuthi unesiphiwo sephimbo kepha akayiphili le nto ayiculayo.
Kukhona abaculi abangakwazi ngisho ukuthandaza kodwa lokhu, kepha beyizipiyoyo zomculo wegospel, zonke izinto ezinjengalezo kumele zilungiswe.
Imali emculweni kankulunkulu iyisibusiso ayisetshenzwa, umculi udumisa unkulunkulu ngephimbo lakhe bese yena embusisa akamkhokheli.
Kayisebenzi indaba yokuthi kumele unkulunkulu aphe umculi imali ngoba uyamculela, inhloso makube wukuhambisa ivangeli likakrestu ngamaphimbo zehle izibusiso. Amen! knowledge.simelane2ilanganews. co.za