Sekunjalo ngempucuzeko
INTAKA izobe ibekelwe amazolo epeople's Park, emoses Mabhida, ethekwini mhla zingama-22 kuntulikazi (July), lapho izinsizwa nezintokazi zikamasikandi zizobe zishikilisana ngengoma emcimbini wempucuzeko oba minyaka yonke.
Sesiphinde sashaya isikhathi esithathwa njengesibaluleke kakhulu kubathandi bakamasikandi njengoba ekupheleni kwenyanga zizobe zibulalana ngengoma. Lesi sikhathi baze basiteketise ngokuthi yiworld Cup yomasikandi.
Abaculi abaningi baye bahlele ukuhlangana nabalandeli babo kwezinye izingxenye zetheku bese beza emcimbini sebeyinhlabaluhide okungenye yezinto ezenza lo mcimbi uhlabahlose. Kulindeleke ukuba itheku lihlobe ngemibala ehlukene njengoba abalandeli sebenemibala abazikhethela yona. Isibonelo, ukhuzani Mpungose uhloba ngoluhlaza nabalandeli bakhe, igcokama Elisha lihlobe ngomhlophe bese Amageza ahlobe ngolayimu
( lime) njalo njalo.
Njengoba lo mcimbi uba minyaka yonke kuyehluka okwenziwayo kuwona, unyaka nonyaka amaciko aye aziqhamukele nokwawo. Ngonyaka ophelile bekudume ukubekwa kwamakhosi njengoba abanye babegibela nezihlalo esiteji bagcobane, bagaxane amabhande abhalwe imibhalo ehlukene eminye ibhalwe ukuthi unozibanibani useyinkosi.
Eminyakeni edlule lo mcimbi ububa securries Fountain ngenxa yokwanda kwesibalo sabantu abawuhambelayo kwaphoqa abasunguli bawo ukuba bawuthuthele epoeple's Park emabhida. Ezokuphepha zizobe ziqiniswe kakhulu njengoba kulindeleke kube nezinkampani ezimbili zabaqaphi abazimele, amaphoyisa kamasipala bese kuba NESAPS.
Kubalandeli abazohlanganyela kwezinye izindawo ngaphambi kokuba beze emcimbini, kuzoba khona amaphoyisa azobe ehamba nabo ukuqinisekisa ukuthi alukho uthuthuva olusuka endleleni. Phakathi kwamaciko alindekele ukuba ashiyelane inkundla, kubalwa uthokozani "Somnandi" Langa, ukhuzani "indlamlenze" Mpungose, umthandeni "Igcokama Elisha" Manqele, ujaiva Zimnike nomjikijelwa ukubala nje abambalwa.
Abanye abaculi bazocula bukhoma bese kuthi abanye bacule ngokulekelelwa yi-cd. Amathikithi alo mcimbi atholakala esangweni ngo-r100 bese kuthi awezicukuthwane abize u-r350. Utshwala namabhodlela akungeni nhlobo ngaphakathi.
ILANGA Langesonto lixhumane noxolani Mcineka, ongumsunguli walo mcimbi ukuzwa kabanzi ngezinhlelo zabo, uthe: “Sesimi ngomumo akusekho ukujikela emva kwendlu, selushayile usuku olungaliyo.”
"Sifisa abantu bafike ngobuningi babo izinhlelo zethu zinkulu kakhulu," kusho umcineka. IPRASA okuyinkamkampani yezitimela izobe ithutha abantu mahhala ibayisa emcimbini iphinde ngemuva komcimbi ibagodukise. Kugcizelwe ukuba abantu baphathe izihlalo zokuhlala namatshali okumbatha ngoba lolu suku luthathwa njengosuku lomndeni. Umcimbi wempucuzeko uxhaswe YIKZN Art And Culture, Prasa nokhozi FM.