Sizalwa singazazi siyoba yini empilweni
LESI sifundo sokuhlakula ingqondo engikubhalela ngaso namhlanje, sengake ngabhala ngaso eminyakeni eminingi eyedlule.
Namhlanje ngithe angisiphinde, singakusiza uma ufundisisa kahle, kanti esinye isizathu ngesokuthi sizobe sibuka sona ohlelweni esilwenza nomroza, olubizwa ngendiza Nathi, olungena ngo-12h00 kuya ku-15h00 emsakazweni ukhozi FM.
Njalo uma kuwumsombuluko, siyaye sibheke kakhulu ezamabhizinisi, nokuyilapho sizobuka khona ukuthi wenza kanjani ukuthi ume isibindi ngesikhathi sokuwa entweni obuyizama.
Siphinde sibheke nokuthi uvuka kanjani uphinde uthathe amandla uphokophele phambili.
Sizalwa singazi ukuthi siyoba yini empilweni.
Kodwa iqiniso wukuthi sonke uma sifika emhlabeni sifika sifumbethe lukhulu nomhlaba osuke ungakwazi.
Lokhu esisuke sikufumbethe kuvamise ukufihlwa engqondweni yomuntu nomuntu, bese kuthi ngokusizwa umdali, kuye kuvela njengoba umuntu esuke ekhula.
Yingakho nje ubona abantu beyizinto ezahlukene emhlabeni, abanye bayizincithabuchopho emikhakheni eyahlukene, abanye bangosozimali abahlonishwayo.
Abanye babo basuke befundile bagogoda baze babizwa ngosolwazi, kodwa futhi kukhona abangafinyelelanga kuleli qophelo esengilibalile ngenhla.
Ziningi izizathu ezingaba yimbangela yokungafinyeleli kulelo zinga lempilo.
Okunye kwakho kungaba wukungabi namathuba akahle ekukhuleni kwakho, okungasho ukuthi awusitholanga isikhathi nokulekelelwa ekubeni uhlahle ikusasa lakho njengokuthi uthole imfundo efanele, uze uyofika emazingeni aphakeme emfundo.
Okunye kungaba yisimo esingesihle okhulele ngaphansi kwaso. Mhlambe ukhule abazali bengenayo imali yokukusimamisa, kungaba kwezemfundo, ezamakhono noma ezamabhizinisi.
Kwesinye isikhathi ungathola umuntu obe nayo inhlanhla yokukuthola konke engikubale ngenhla, kodwa ngenxa yezimo zezwe, wabuye walahlekelwa yikhona konke onakho.
Isikhathi esinzima kakhulu-ke lesi ngoba kwasayena lo muntu owehlelwe yilesi simo, kusafanele athole izeluleko ezizomenza emukele ukuthi isimo sempilo sesibuye saguquka, akusenjengakuqala, usengazithola ecela, kade engumacaphuna kusale.
Empeleni kumele sonke sihlale sikulondolozile ezingqondweni nasemicabangweni yethu ukuthi impilo iyohlale inezigodi okuyomele sizewuse, nemimango okuyomele siyikhuphuke.
Nemifula eyobe igcwele idla izindwani, kodwa esiyobe silindeleke ukuthi siyiwele.
Kuyomele sazi imihla yonke ukuthi ezikhathini zempilo, kukhona nalesi okuthiwa ubusika, nokuyisikhathi esingathandwa muntu, ngoba kusuke kuyisikhathi sendlala, ukubanda nesomiso.
Kuyomele ukuthi noma sekukwehlele konke lokhu, ukhumbule ukuthi bakhona okuke kwabehlela ngaphambilini, kwesinye isikhathi umhlaba waze wabahleka, ubukisa ngabo, kodwa bavuka bazithintitha uthuli lokuwa kwabo.
Khumbula phela ukuphokophela phambili, ugijime njalo ngokubekezela baze banqoba. Nawe namhlanje, ngikumemela ukuthi noma ngabe yini ekwehlele yakubuyisela emuva.
Okungenzeka ukuthi nawe bakuhlekile, bakukhomba, bakubeka izici, bakubiza ngamagama, kodwa okwakho wukwazi ukuthi imfihlo yokunqoba emhlabeni ilele kakhulu ekutheni wazi ukuthi yini ongeyona.
Lokho kuzokusiza nasekuthi wazi nokuthi yini oyiyona ukuze kuthi uma abantu bekubiza ngongekhona, ungachithi isikhathi sakho ngezimpikiswano ezingakuyisi ndawo. Okubalulekile wukuthi wena usebenzele ukuba umhlaba ubone lokhu wena oyikhona, okungakabonakali okwamanje.