EZESIMANJE:
NGINGUMUNTU ozithandelayo ukuvakasha nokuhlangana nabantu abasha. Kuthe uma ngithola isimemo sokuvakashela egooderson Hotel izinsuku ezimbili angizange nginanaze kwazise sesiside isikhathi ngigcinile ukushaywa wumoya.
Kuthe uma ngibuyelwa wumqondo ngakhumbula ukuthi lesi yisimemo sokuya endaweni ebanda ngokweqile idrakensberg, ngacabanga kaningi ukuthi ngihambe okanye ngiyeke, kodwa-ke ngigcine nginqume ukuhamba.
Into yokuqala nje engifikele uma ngipakisha, ngeyokufaka lonke uhlobo lwempahla yokugqoka efudumalayo ukuze ngingagodoli ezintabeni. Ukusuka ethekwini uya ezintabeni zokhahlamba, cishe kuthatha amahora amathathu.
Kuba kuhle uma uzoba nenoveli ozohambe uyifunda uma kungenjalo ube nomculo ozowulalela ukuze ungabi nesizungu endleleni. Inhloso yohambo bekuwukutshengisa abezindaba ubuhle bale ndawo nehhotela uqobo.
Uma sifika samukelwe ngezandla ezifudumele ngabasebenza ehhotela nopeter Muil oyimenenja-jikelele kuleli hhotela. Nokho be-kungemakhaza njengoba bengica-banga kwazise bekusemini beba-de. Sinikwe izikhiye zamagumbi ethu okulala nebala sanikela kuwona.
Uma ungena akwenza uzizwe wamukelekile, iphunga elimnandi nezingubo zombhede ezimhlophe qwa kukwenza ufise ukuziphosa phezu kwayo udlalise okwengane. Kuthe uma ngivula amakhethini ngakhangwa wubuhle bezintaba obubonakala kobhazabhaza bezingilazi. Kuzo lezi zingilazi kunesicabha esiphumela ngaphandle lapho kukhona izihlalo ezimbili netafula lokuziphumulela.
Kuthe ngisaxakwe wubuhle begumbi ebengikulo, sashaya isikhathi sokuthi ngihlangane nethimba labezindaba ebesivakashe nalo kule ndawo. Phela besekuyisikhathi sokuthi sithole iyambazi.
Sibe sesithathwa yimoto ebesihamba ngayo saqonda eglen Gary Country Club, nakhona semukelwa ngezandla ezifudumele ngabasebenza khona. Ubuthi udla ube ubuka ubuhle bezintaba kwazise zisondele kakhulu kule ndawo njengoba isentabeni kwayona.
Uma ubuka ngaphesheya kunechibi elihle elinebhuloho okwazi ukuthi uhambe kulo, uthwebule nezithombe. Kuthe uma siqeda ukudla sayodlala ibhola ( bowling) okungenye yezinto zokuzithokozisa ezitholakala kule ndawo.
Ngokuhamba kwesikhathi sidlale sakhathala kwabe sekuyisikhathi sokuyophumula emagunjni ethu kwazise uhambo belulude kanti besesingcolile sidlala ibhola elangeni.
Ngokuhlwa siphinde sahlangana sesiya e-eagles Roost eyakhiwe phakathi ehhotela lapho besiyodla khona isidlo sakusihlwa. Mangikubeke obala ukuthi
amakhaza antambama angenze ngembatha ijezi, ijazi nesikhafu ngendlela obekubanda ngayo. Ibhulukwe ebengiligqokile bekungathi lithelwe ngamanzi abandayo.
Ngenxa yokuthi abendawo bayazi ukuthi kuyabanda, besibaselwe ikloba lomlilo ngaphandle. Kuze kwashaya cishe ihora le-11 ebusuku sixoxa sithokozela imfudumalo yomlilo.
Abathanda ezemidlalo kunobhazabhaza kamabonakude okwazi ukuwubuka ngisho ungaphandle. Akekho obefisa ukuvalelisa ngenxa yokuthi sonke besithokozile.
Indlela yokuyolala bekuwukuthi uvele unyomuke ungabonwa muntu. Ngempela ngenze njalo ukuze bangaphatheki kabi ozakwethu uma sengiyolala. Imfudumalo yegumbi ebengikulo yenze ngakhohlwa nawukuthi ngisezintabeni, ngagcina sengilele. Ngosuku olulandelayo sivuke sayodla isidlo sasekuseni esimnandi.
Uma siqeda kwabe sekuyisikhathi sokuzithokozisa, siqale ngokuyontweza sisuka esicongweni sentaba ( ziplining). Ukuya kule ndawo kuyitoho, ikakhulu uma ungajimile njengami, ufika usuhefuzela esicongweni sentaba. Okuthokozisayo wubuhle obudlulayo ngesikhathi usaya entabeni kukho esingabala umfula onamatshe amahle namanzi ageleza kube sengathi ayahuba.
Kangisayiphathi eyobuhle bezintaba nemithi ehlukene ethi ayibe yizimbali. Kuthe uma amaphaphu esehlile sesiqedile ukuntweza emoyeni, kwabe sekuyisikhathi sokuyodubula ngemicibilisholo (archery). Nokho ngisheshe ngayeka kwazise ngiyinxele, bengilokhu ngigeje njalo.
Kokunye obekukhona kokuzithokozisa wukugibela ihhashi likuzulise ezintabeni noma ugibele ibhayisikili. Kuthe uma siqeda kwaba yisikhathi sokuziphumulela abafuna ukuyobhukuda benza njalo kwazise amanzi abefudumele kancane kodwa umoya obandayo ubusalokhu ukhona yize ilanga beliphumile.
Isidlo santamba sisidle ebergview Restaurant esondelene namadamu lokubhukuda ( swimming pool) ngenxa yokubanda obekungu 5 degrees celsius sonke sisheshe sacela indlela sayolala.
Abaziyo bathi okungapheli kuyahlola! Usuku olulandelayo lwangomsombuluko, bekungolokugoduka siye emakhaya emva kwempelasonto emnandi.
Ukuba kude nedolobha , uzwe umlozi wezinyoni, ukuheleza komoya ohlanzekile nokugeza amehlo ngendalo kuyadingeka kwesinye isikhathi.
Abendawo bathi uma ufisa ukubona izintaba zembethe iqhwa kumele uvakashe ngontulikazi (July) kodwa-ke amakhaza asuke ebuza ukuthi ungubo ngaki. Uma ufuna ukushaywa wumoya nabathandiweyo bakho ngeke uzisole ngokuvakashela egooderson.
tzondi@ilanganews.co.za
Ukuba kude nedolobha, uzwe umlozi wezinyoni, ukuheleza komoya ohlanzekile nokugeza amehlo ngendalo kuyadingeka kwesinye...