6.NGIPHINDELE ESOKELI LAMI LAKUDALA?
PASTOR: Ngingowesifazane (25) ngathola isoka ngonyaka owedlule sathandana, ngalibuza ukuthi linaye omunye umuntu, laphika.
Manje sengibambe ukuthi linentombi ngaliyeka, ngathola elinye isoka elingiphethe kahle. Inkinga isoka elidala seliyabuya lithi liyangithanda futhi seliziyekile izintombi zalo ngoba lifuna ukuba nami manje nami sengizizwa ngilithanda futhi. Ngabe nginephutha uma ngivuma sibiyelane?
IMPENDULO: Dadewethu kuyadabukisa futhi kuyahlukumeza ukubona umuntu wesifazane ongazazi futhi ongazi ukuthi udingani empilweni. Kule nkinga obhekene nayo ngicabanga ukuthi kufanele uhlale phansi nawe uzibuze ukuthi udinga nhloboni kapende empilweni ngoba ukushintshashintsha amadoda kakusizi. Ungavumeli ukuba yi tennis ball bakushaye ngala nangale uphinde ushaywe nala uphindwe ushaywe nale futhi umuntu akadalelwanga leyo nto yibhola luphela elidalelwe lokho.
Kubuhlungu ukubona umuntu esephelelwe unembeza ngoba izinga lakhe liyehla futhi ngiyacabanga nje singamadoda sigangile singamuyekisa umuntu into asuvele ekuyo, sikulande sikuthembise izulu nomhlaba kanti kasinawo ngisho ummjondolo lo.
Ungaboyiyeka into ekuphethe kahle ngoba ujahe ukuya entweni ekuthembisayo. Inyoni esivele isesandleni ingcono kunale ekhala laphaya esihlahleni ngisho ingakhala kamnandi kodwa ungayidedele le esisesandleni isinqumo ke dadewethu singakuwe. Akekho umuntu oyonqumela omunye othandweni ukuthi enze njani.
Umuntu uzithathela yena isinqumo, alalele inhliziyo yakhe, bese elalela nonembeza wakhe ukuthi uyavumelama yini naye.
* Uma ufuna ukuthola umfu Zondo bukhoma, vakashela ibandla lakhe njalo ngesonto ngehora le-10. Sisejewish Hall enkabeni yetheku.