Ungashiyi umuntu wakho ngenxa yeshende
NJENGOBA siphuma kwimpelasonto enzima yevodacom Durban July (VDJ) baningi asebengabaza amandla abantu babo. Phela kule mpelasonto, izesheli namashende bebeshisa bekhipha abantu babantu bebayisa ezindaweni eziphambili.
Uma ungumuntu obuthaka uzosishiya isithandwa sakho ngenxa yeshende ebelikudlisa butebhu ngempelasonto. Singasakhulumike nje ngale mpelasonto kuphela kodwa sengikhuluma ngempilo jikelele.
Ungake ulinge udidiswe ubumnandi besikhashana bese uthi kuyabhora ekhaya.
Into okumele uyifake ekhanda ukuthi uma isesheli sikhipha imali eningi ukujabulisa wena, lokho kusuke kungachazi ukuthi imali ozoyithola impilo yakho yonke leyo kodwa usuke ephosa umgqa-kazo ukuze usondele eduze bese ekubamba.
Ngakho-ke ngithi ungadidiswa yinto yesikhashana bese ulahla into yakho yemihla ngemihla. Lento yithathe uyifanise nemoto. Imoto yokwebolekwa ibiza kakhulu kunemoto yakho oyithengile.
Phela lena ebolekiwe usuke ukhokhela lezonsuku ozoyisebenzisa ngazo kuphela. Uma ifa uyishiya khona lapho abanikazi bayo bayithathe bakulethele enye.
Kodwa lena eyakho lapho ifa khona kudingeka wena uqobo. Ngisho ngabe inomshwalense kodwa usuke ukhokhelwa nguwe.
Lokho kusho ukuthi ungalindeli izizumbulu zemali kumaqondana wakho ngoba nakhu ishende lakho okanye isesheli sesikudidise ngemali.
Phela umaqondana uyakunake- kela ngasosonke isikhathi futhi kwesinye isikhathi usuke enezinhlelo ezinhle ngawe.
Ngakhoke konke anakho kuyefana nokuthi kungokwakho. Ngalo mbhalo angigqugquzeli ukuthi abantu babe namashende kodwa ngeke sikubalekele ukuthi bakhona abantu abaphila le mpilo.
Uma kungukuthi ukhona kulabo bantu lo mbhalo ubheke kuwe ngqo. Bese kuthi labo abangakwenzi lokho, abaqhubeke bengakwenzi akukuhle neze. Ake ngiphume-ke kothathekile ngingene kuwona amadoda uqobo. Ukuze umuntu wakho engathatheki yizinto zangaphandle konke lokho kulele kuwena. Kubalulekile ukuthi umuntu wakho umjabulise athole yonke into ayifunayo ekhaya.
Abanye osisi baze babe namashende nje ngoba banamadoda angakholelwa ekukhipheni umuntu wesifazane.
Thatha umuntu wakho uye naye emabhayisikobho, uma unemali ethe xaxa muthathe uyomthengisa izinto azithandayo. Ayikho into ethandwa abantu besifazane njenge “Shopping” futhi benjalo nje izingubo zabo aziduli kakhulu.
Ngakhoke qinisekisa ukuthi umuntu wakho ujabulile. Uma unezimoto eziningi, mnike naye ithuba lokuhamba ngayo nabangani bakhe.
Ungabi ilamadoda athi “Eyami imoto ayishayelwa umfazi” kodwa amashende akho ayayishayela. Menze azizwe kunguyena yedwa obalulekile emhlabeni. Ngisho ngabe awusiyena umuntu onemali kodwa lokho okuncane uyokujabulela. Ungadidiswa abantu ugcine uthathe umuntu ongaphezulu kwamandla akho.