Abamakwaya mabacule ngenxa yothando hhayi inkence
ABACULI abacula umculo wamakwaya noma becula beyibinza kumele bazi ukuthi izindleko zabo zinkulu kunomculi ocula yedwa.
Sikusho lokho ngoba baningi esiye sibezwe bekhononda baze bashiye phansi amakwaya noma amaqembu ngoba bekhala ngokuthi imali abayitholayo yincane bese befuna ukuzimela.
Umculo wabantu abaningi ngeke waze wafana nowabantu abambalwa kanjalo uma sekuphakwa abaningi bathola kancane kunalabo abayingcosana.
Uma umculi ejoyine ikhwaya enabaculi abaningi, makabe nolwazi zibekwa nje ukuthi uzoculela uthando kunokuculela ingcebo. Uma abaculi beyikhulu lelo khwaya lisuke likhipha imvunge emnandi ngoba lakhelwe lolo hlobo lomculo.
Izindleko zabaculi abaningi nge- zindlela zabo ezahlukene zimba eqolo. Sibala lezi ezilandelayo: Imifaniswano Intilasipoti
Indawo yokuhlala Ezempilo Izikhangiso
Kuningi okudala ukuba kube nzima ukusebenza nabaculi abaningi. Bebodwa abaculi bayinkinga ngoba baba nezinkinga zabo zemindeni ezibehlela nsukuzonke.
Kuke kuthi kufanele ikhwaya iyo-sebenza endaweni ethile bafike bonke abanye kushode oyedwa ohamba phambili ume nse umsebenzi.
Uma kuhanjwa kumele kuqashwe ibhasi esikhundleni semoto eyodwa. Kuningi ukukhuluma okuba khona kubaculi uma bebaningi ikakhulukazi inhlebo nokugxeka. Abaphathi bamakhwaya kumele bakwazi lokho ngaphambi kokuba balibumbe ikhwaya.
Kuba nzima uma ikhwaya lizobuye libe nabadlali bezinsimbi nabo baba nolwabo uhlupho. Uma kuthiwa kuyaqoshwa esitudiyo kudingeka sibe sikhulu okuyizindleko khona lokho.
Kuba nemikhuba yakhona ekhwayeni elikhulu, kukhona ababuye bajikelane baqomane bese umsebenzi ungabe usahamba kahle abaculi bengasayithathi imiyalelo yabaphathi. Kube nzima kakhulu uma othile ethandana nomphathi wekwaya .
Uma sekufikwa odabeni lokuholelwa kwezimali abaculi bathola inkeshezana baqale ukuduba umculo abanye bahlambalaze abaphathi sebekhohliwe wubuningi babo. Sibakhuthaza ukuba bajoyine amaqembu emiculo ngezinhliziyo zothando lwawo hhayi ukujaha imali.
Kumnandi ukubona abesilisa nabesifazane abadala nabancane behlangene bekhipha umpe ngaphansi kwamakhala. Kuze kube sengathi kuyisithombe sokuthi isintu sizobe simculela kanjani ujehova sesiphambi kwakhe ngomhla wo-kuphela.
Mawuye phambili umculo wamaphimbo amaningi ngoba ukhombisa ukuzwana kwabantu, uwuphawu lobumbano esizweni. Uthando lomculo maluhambe phambili, imali emuva. knowledge. simelane2ilanganews.co.za