Umsholozi ubhuqa thina bantukazana
HLELI: Ezinsukwini ezimbalwa umengameli Jacob Zuma ( osesithombeni) ukhulume amazwi amakhulu ethi: ‘’Umthethosisekelo uyisidada, unamaphutha amaningi ngoha uvikela futhi ucabangela izigebe-ngu ngaphezu kwezakhamizi zasezweni zona ezihlonipha umthetho wezwe.
Buka ngoba uthi umuntu enze ubugebengu ubizwe ngomsolwa, sona futhi isigebengu sinamalungelo amaningi adlula izakhamizi zezwe.
Uma umphakathi uma ushaya isigebengu umthetho uyawubopha umphakathi. Ngokunjalo nephoyisa kalisakwazi ngisho ukushaya isigebengu ngempama ngoba lizomangalelwa yisigebengu. Ubugebengu bungaka nje ezweni ngenxa yawo umthetho indlela oxega ngayo. Ngakho kumele ukuba ushintshwe umthethosisekelo.’’
Makhulu la mazwi uma ekhulunywa yinhloko yezwe. Empeleni la mazwi afanele thina bantukazana, hhayi umengameli ngoba uyinhloko yezwe. Kangiqondi noma umengameli la mazwi uwasho ngoba ewathola emaphepheni kukhala izakhamizi yini kwazise kangiqondi ukuthi umengameli uwasho ngoba ewatshelwa ngabantu ahlanganana nabo, okanye uwatshelwa ngabeluleki bakhe.
Kwesinye isikhathi uke akhale ngabo abeluleki athi kabameluleki ngendlela efanele.
Baba Mengameli, yithi bantu abasezingeni eliphansi esihlala sikhala ngendlela uhulumeni owuholayo owenza ngayo manje uma sewusho kangazi mhlawumbe ukuthi Mengameli usithuma ukuthi senzenjani-ke. Ngabe umengameli usiyalela ukuthi sisuke phansi sibhikishe silwe nawo umthethosisekelo?
Lokho sizokwenza kanjani futhi ngamaphi amaqhinga? Yini yona eyenza umengameli lokhu akubone manje? Phela kade lo Mthethosisekelo wasayinwa ngumengameli wokuqala wentando yeningi ongasekho, ubaba unelson Mandela.
Ngowanini-ke u-1996 wasayinwa lo Mthethosisekelo?
Ingani balapha emaphalamende bashaya imithetho esingahambisani nayo kwasa kwaphuma ngenxa yokuthi uyiningi ephalamende uvese uphasise umthetho, kuthi uma amaqembu aphikisayo ephika kufane nokuthela amanzi emhlale wedada.
Ngisola ukuthi umengameli uyasibhuqa isizwe ngoba kwayena akumele engabe usabus ngenxa yenkohlakalo asolelwa kuyona.
Ingani nakhu usanda kwephule umthethosiseko okuyincwadi enkulu yokubuswa kwezwe. Abamvikelayo bacasha ngawo lo Mthethosisekelo.
Mengameli ngoba nakhu icala noma iphutha lomthethosisekelo uyalibona pho usahlaleleni? Yisemkhulu Nzimande, EPORT SHEPSTONE