KUNEZIMALI ZAKULELI EZISHUSHUMBISWAYO
Sinesibopho sokulusukumela udaba lwezimali zakuleli ezishushumbiselwa kwamanye amazwe ngokungemthetho. Kuyaziwa ukuthi kunezinkampani ezizinze kuleli ezikhokhobisela kwamanye amazwe izigidigidi zemali eyinzuzo eziyenza ngezithukuthuku zabantu bakuleli kodwa ezigwema ukukhokha intela kuleli. Usuku nosuku kuvela imibiko eshaqisayo ngamatulo ezinkampani ezinkulu ezihlangana zibophe amacebo ngamanani ezimpahla ezizithengisayo okwenza kube nzima kakhulu ukuba abanye abantu bangene kuleyo mikhakha yamabhizinisi. Kuvele izindaba ezishaqisayo ngalomkhuba wezinkampani ezinkulu ngesikhathi kwakhiwa izithabathaba zezinkundla zikanobhutshuzwayo ezisetshenziselwe indebe yomhlaba ngo 2010. Kukhulunywa lapha ngezigidigidi zoqobo zamarandi, kanti sekusobala ukuthi lomkhuba usabalele emikhakheni eminingi eyehlukene yamabhizinisi nezimboni.
Yizinto ezinjena-ke uhlelo lwezinguquko ezinqala kwezomnotho olubhekene nazo ngoba siphinde siqaphele ukuthi kukhona okungalungile impela uma emuva kweminyaka engu 23 sazuza umbuso wentando yeningi amafund Managers amnyama elawula kuphela R300-billion esigaxeni esingu R6-trillion ophethwe ngabathatha izinqumo ngokuthi isetshenziswa kanjani lemali engaka. Njengenkampani egixabezwe izizumbulu zemali uhulumeni ayitshala emabhizinisini ehlukene, silindele ukuba ipublic Investment Corporation (PIC) lo R1.8-trillion ewusingethe iwusebenzise ngendlela ezosisiza ukufaka umfutho owengeziwe ekulethweni kwalezi zinguquko ezinqala kwezomnotho esikhuluma ngazo. Lisemqoka nakakhulu iqhaza LE-PIC ngoba oguqukweni okubambekayo esifuna ukulubona ngukuqhibuka kosozimboni abamnyama abanohlonze abazoba sekhaleni lalezi zinguquko ezinqala kwezomnotho. Ngeke sigculiseke ngabalikhulu kuphela okunezinhlelo zokuba babe sebekhona ngonyaka ozayo. Sincane kakhulu leso sibalo ngoba usemkhulu kakhulu umsebenzi okufanele wenziwe ukuletha uguquko lwangempela emnothweni walelizwe.
Sikusho lokhu ngoba manje akusafani nango 1994 lapho babeyidlanzana abamnyama ababenamakhono nolwazi oludingekayo ngokusebenza kwezimboni ezinkulu. Ngo 2017 seyizinkulungwane abamnyama abahlome ngolwazi oluphelele futhi abaqeqesheke ngokufanele ukuba banikwe ithuba. Sithinta nje lapha okumbalwa, ukweneka isithombe sokuthi kuqondweni ngaleradical Economic Transformation. Okubaluleke kakhulu wukuthi njengoba siya engqungqutheleni kazwelonke YE-ANC ngozibandlela sikhumbule ngesinqumo esasithatha sigcina ukuhlangana emangaung ngo-2012 ngalolu daba. Empeleni sasigcizelela umgomo WE-ANC kwezomnotho osuselwa ezimisweni zomqulu wenkululeko owasiyalela ukuthi abantu baseningizimu Afrika bayohlomula bonke emnothweni wezwe. Siyakuqonda ukuthi noma kukuningi osekwenziwe, kodwa lenkululeko yomnotho esikhuluma ngayo kwifreedom Charter isazothatha iminyaka ukufezeka. Yikho nje emangaung sivumelane ngokuthi maluphuthunyiswe uhlelo lwezinguquko ezinqala kwezomnotho ukuze sibhekane nalezi zinselelo ezintathu eside sikhuluma ngazo zobubha, ukweswelakala komsebenzi nokungalingani. Akukho ukuhlehlela emuva ngoba isineke nokubekezela kwabantu bakithi phezu kweminyaka engaka yenhlupheko nengcindezelo kunomkhawulo. Ngeke bagoqe izandla unomphelo uju nezinyosi kumimilitwa ngabezizwe ezweni labo.
Udkt Zweli Mkhize ungumgcini-mafa we-african National Congress
Siyaxolisa ngengosi yomhleli izobuya ngeviki elizayo