Uyachanasa umbhishobhi
ITHI ingaba nkulu ingazekeki. Namanje kusabanjwe ongezansi ngendaba yombhishobhi ujabulani Mvubu (38) ogwetshwe isigwetshwa kanjani enkantolo yamacala obugebengu obuhleliwe ethekwini ngolwesibili.
Ezakamuva zithi wehliselwe isigwebo emuva kosuku egwetshiwe, waphinde wabuyiselwa emuva nesamba semali abezoyikhokhela izisulu aziqola ngenxa yokungacaci kwemininingwane yazo.
Imantshi unkz Christo Mazibuko ibimgwebe amahora ayizi-7 000 ebhadla ejele, ezowadonsa ngezimpelasonto kuphela kodwa kuthe kungakapheli nosuku lwangolwesibili wabe esexegiselwe isigwebo sehliswa saba ngamahora ayizi-2 000.
Kuthiwa umvubu utheleke enkantolo ngolwesihlanu ephethe insuvunsavu yemali abeqonde ukuyikhokhela izisulu kepha wabuyiselwa emuva ngumabhalane ngoba ethi kukhona okumele kuqale kulungiswe yimantshi esigwebeni sakhe.
ILANGA Langesonto lithole ukuthi uphinde wavela enkantolo ngalo ulwesihlanu wanikezwa usuku lomhla ziyi-14 kumfumfu (October) oluphinde lwaba yinkinga ngoba luzobe lungempelasonto. Kuthiwa umvubu uzophinde avele kusasa ngomsombuluko kuzolungiswa indaba yosuku.
Lokho-ke kuchaza ukuthi usazo- zichanasela ngaphandle kuze kube yinyanga kamfumfu.
Okunye okuvelile ngalolu daba wukuthi lesi sigwebo sikhonondise abaphathi bamajele banquma ukuba sibuyekezwe ngendlela esikhishwe ngayo.
Kwenzeka lokhu nje izisulu ziyaveva zithi ngeke zikuthole ukuphumula engajezanga umvubu ngesenzo sakhe. Inkampani ezibiza ngesivuno samadunge yiyo eyafaka icala ilandelwa ngamakhulu abanye abantu abakhala esifanayo.
Sililandele ukusuka nokuhlala leli cala kusukela ngosuku lokuqala lapho ayevele khona enkantolo yasemzinto eningizimu yekwazulu Natal mhla zingama-27 kuzibandlela (December) ngonyaka wezi2014 phambi kwemantshi unkz Veliswa Dube. Ngalolo suku izisulu zabe zivutha bhe zifuna imali yazo ngo "dli" ijazi lephoyisa.
Wangena enkantolo edlubhe izimpahla zokugijima ayekade elale ngazo ezitokisini impelasonto yonke.
Imantshi yamkhipha ngebheyili yezi-r10 000 umphenyi esaqhubeka nophenyo. Ngosuku avela ngalo unina omzalayo wayekhona lapho ekhala mi, ethi ubone into angakaze ayibone abantu becishe bebulala indodana yakhe okuwukuphela kwayo befuna izimali zabo.
Umseshi owabe ephethe icala ngaleso sikhathi wankwankwaza waphenduka ingane encane ephe- kwa ngemibuzo ngummeli kamvubu u-advocate Sogoyile Nene ejutshwe ngummeli umnu Sipho Ngubane. Lo mseshi wayehlulwa nokubiza uhlelo lukamvubu oluzishaya sabhanoyi izuza 4 Life.
Udaba lukamvubu luqale ngokuthi ngonyaka wezi-2013 asungule uhlelo abelubiza ngezuza 4 Life lapho ebegqugquzela khona abantu ikakhulukazi abakholwayo ukuba bahlangane bakhe amaqoqwana abantu abayisihlanu abanye bekhokha imali esukela emalini engaba ngama-r1 600 kuye ngamandla omuntu. Ibandla lakhe yigrace Ministries elinegatsha emalangeni khona emzinto.uzalwa emthwalume eningizimu yeKwazulu Natal.
Ubebathembise ukuthi iqoqo ngalinye lizozuza imali eyizi-r15 million lisungule amabhizinisi alo.
Ubenethonya nolimi olumnandi kangangoba namanje njengoba egwetshiwe nje kukhona abasamlandela enkantolo ngethemba lokuthi basazoceba. Abanye batshele ILANGA Langesonto ukuthi ubesaqhubeka nebhizinisi lakhe.
Selokhu icala lakhe ledluliselwe kule nkantolo equla amacala obugebengu obuhleliwe belilokhu lihlehliswa ngezizathu eziningi. Phakathi kwezinye izizathu singabala lezi:
* Kuke kwagula abameli. * Kwagula ofakazi.
* Kwesinye isikhathi bekuhlambuluka izisu kwabathamele icala.
* Usonhlalakahle wenze amaphutha amaningana ophenyweni lwakhe.
* Izisulu bezike ziphikisane ngokuthi yini eziyifunayo phakathi kwemali nokuba aye ejele.
* Ubehlale ehlafuna, uma ebuzwa athi uhlafuna ushingamu.
* Ubengenaluvalo enkantolo ezixoxela nabalandeli bakhe.
* Abalandeli bakhe bebengayibuzi eyokuthi bazoyithola kanjani imali yabo yize eselahlwe ngama
cala. Okunye okuvelile ngomvubu wukuthi ushadelwe, unezingane ezintathu kanti uke walahlwa yicala lokukhwabanisa ngonyaka wezi2010 isigwebo salengiswa.uke waba nguthisha ongaqeqeshiwe kwaze kwatholakala kamuva izikhulu zingamboni.
Iseyindida indaba yenkampani yakhe athi uqashe kuyo abantu abangama-65. Ngesikhathi kuqhubeka icala ubezwakala exoxa uma inkantolo ingakahlali ethi uzoqopha umculo we-gospel ngoba unesiphiwo sokucula. Uzwakale futhi ethi uma lingaphela nya icala ufuna ukusungula iqembu lezombusazwe ngoba unabalandeli.
Esicelweni sakhe sebheyili kwavela ukuthi akanawo umuzi othi yena ubehlala emqashweni, awekho amafa anawo ngaphandle kwesiza esingalungisiwe sakubo emthwalume.
Akumangazanga-ke uma abalandeli bakhe bembiza ngegama elithi, “Nguphunyuka bemphethe onompunyumpunyu”. knowledge.simelane@ilanganews. co.za