Isinqumo senkantolo ngomvubu siyakhalisa
KUVULEKE ELINYE ikhasi emlandweni wezinkantolo kuleli ngesikhathi inkantolo yamacala obugebengu obuhleliwe ethekwini igweba ngendlela engajwayelekile ozibiza ngoMbhishobhi ujabulani Mvubu wasemzinto owavume onke amacala okukhwabanisa nokuzenza ibhange ngolwesibili.
Phela kwenzeke okungajwayelekile lapho imantshi unkz Christo Mazibuko iqala ngokushumayeza umvubu imfundela amavesi asebhayibhelini maqede yamtshela ukuthi izomgweba ngobuhlakani obacelwa yinkosi usolomoni wasebhayibhelini emandulo.
Kumangale wonke umuntu uma ivele ithi imgweba amahora ayizi-7000 azowadonsa ngezimpelasonto yathi imhlawulisa ukuba akhokhe nyangazonke imali eyizi-r20 000 obekumele ayikhokhe kusukela ngolwesihlanu.
Ecaleni lokuzenza kwakhe ibhange imgwebe inhlawulo eyizi-r10 000 noma iminyaka emithathu ebhadla ejele kodwa salengiswa sonke lesosigwebo iminyaka eyisihlanu engatholakali enze icala elifuze leli.
Ezishaqisayo ngalesigwebo sokuqala samahora ayizi-7 000 ngezokuthi kuthe ngoLwesihlanu waphinde waziswa umvubu ukuthi siyaxegiswa okusho ukuthi usezodonsa amahora ayizi-2 000 esikhundleni sayizi-7 000.
Kuphinde kwenzeka enye futhi ingwijikhwebu esefikile nemali umvubu eyifumbethe ezoyikhokha kumabhalane wenkantolo umabhalane wamphindisela emuva ngoba ethi kukhona okungalotshwanga kahle kulesi sigwebo mayelana nokukhokhwa kwemali.
Ngesikhathi kuqhubeka icala izisulu zikaMvubu beziphuma njalo zikhuluma zikhala ngokuthi noma zingawukholwa umuthi ukuthi uyasebenza kepha indlela izinto ezenzeka ngayo kusobala ukuthi uyadliwa umuthi.
Bekuthi uma intatheli imbuza ngalezi zinsolo ahleke kancane akhombe amadolo athi uyakhuleka yena akasebenzisi muthi. Umshushisi walelicala unkz Hazel Siraramen uzame konke okusemandleni ukukinatela umvubu emfuna ezikhindini kepha yonke imizamo yakhe ife namthanyana.
Bekuthi njalo uma kuhlehla icala izisulu zihlangane zishaye umthandazo omncane.
Nanxa ezinye ziziqinisa kodwa ububona ukuthi zilusizi futhi zidumele ukubanjwa ngumuntu ebezimethemba njengobaba wazo.
Amazwi ebesizizwa ziwasho bezivamise ukuthi :
“Unkulunkulu uyayizwa imithandazo yethu noma angasibamba kepha ekugcineni uzosiphendulela.”
Amazwi anjengalawa uwashilo umshushisi kwaze kwaba sengathi uyashumayela. Ngisho nabameli bakhe umvubu umnu Sipho Ngubane wasemgungundlovu ubengakujabuleli ukuba ngummeli kuleli cala.
Kusemandleni ezinkantolo ukuba izinqumo ezinjengalezi zizibhekisise zibhekelele imizwa yomphakathi njengoba lokhu kuzoholela ekutheni umphakathi ungabe usazethemba nakancane izinkantolo. Siyazi ukuthi uma umphakathi usulahle ithemba emthethweni izinto ziba mapeketwane ngoba uzithathela wona umthetho.
Siyethemba izazi zomthetho zizoqhamuka nezisombuluko ezinkingeni ezinjengalezi, lokho akusho ukuthi akuboshwe abantu abamsulwa kepha lapho ummangalelwa ezivumele yena ngokwakhe futhi eke walahlwa ngamacala afanayo ngaphambilini kuyadabukisa.